探熱針
食包灼傷嘴 驗出酸鹼度超標 陳浩民老婆：希望港龍 say sorry！
今年九月，陳浩民跟老婆蔣麗莎搭港龍機返香港，在進食航空公司所供應的麵包時，口腔竟遭灼傷，落機後要由救護車直接送往醫院，航空公司事後聲稱並未在當日所供應的麵包中有任何發現，「受害人」蔣麗莎更慘被網民指搏宣傳。
但經過個多月調查，食環署報告卻驗出麵包酸鹼度超標，陳浩民說：「一般食物係七，但個麵包係十。」至於蔣麗莎亦表示：「希望港龍 say sorry。」
麵包酸鹼度高達十
據了解，陳浩民夫婦事後親自將麵包送去食環署做化驗，早前收到電話通知，指導致「出事」的麵包酸鹼度超標，要作進一步詳細測試。
「一般食物係七，嗰個麵包係十，講晒啦。食環署話其實呢個係初步化驗，遲啲會有一個詳細報告；我要湊仔又要開工，唔得閒係咁日日追住，而家都係等電話通知。」陳浩民說。
事發後，第一時間將相 po上微博的蔣麗莎，獲知化驗結果後接受訪問說：「我同浩民唔係要啲咩賠償！如果佢哋話冇問題，但我哋呢度 check到有問題，咁中間係邊度出咗問題呢？搞到我哋好混亂。我唔想俾人覺得我同浩民講大話，好似為咗搏關注度搞大件事，其實我哋想大家關注食品安全同質素，所以好希望港龍同我哋 say sorry，還番一個清白。」
浩民食完即嘔
當日蔣麗莎被麵包灼傷嘴後，已第一時間跟機艙服務員反映，經機組人員試食後，他們隨即將所有麵包收起，冇再派給其他乘客。不過，當蔣麗莎將事件放上微博分享時，卻被網民指責她搏宣傳，召救護車之舉亦是浪費資源。
「我哋當時喺飛機，又點 call救護車呢？救護車係航空公司叫嘅，好多人誤會咗！當時我哋食嘅麵包係凍嘅，我咬咗幾啖就吞落肚，但浩民食完就即刻嘔番晒出嚟，我就冇！航空公司職員好好，驚我有事，所以先 call救護車送我哋入醫院。」陳浩民老婆說。
七位數試水溫
食麵包灼傷嘴，簡直百年難得一遇！但五年抱四，要全天候照顧三女一仔的蔣麗莎，亦無暇再去糾纏。加上機緣讓她結識到研發美容產品的教授，今年四月細女 Victoria出世後，蔣麗莎開始為自己美容事業打拼，不時要飛韓國、內地，周身唔得閒。
「我諗做生意好耐，點知年年大肚，個肚大咗又做唔到。之前喺大陸做咗個真人騷賺咗七位數，我攞住呢筆錢試水溫，如果做得好，浩民可能會幫我，再加碼！不過而家啱啱開始，我唔想攞老公錢，做咗生意後，我學到好多嘢，最重要係擴闊咗朋友圈。」蔣麗莎說。
醫生朱蘊晶：濃度再高會令食道留疤
陳浩民透過食環署化驗，得知出事的飛機餐麵包，酸鹼度超標，難怪一食成個嘴唇起水泡。本刊訪問家庭醫生朱蘊晶，她解釋若驗出食物含酸鹼度值高於標準，是酸濃度太高。「若驗出有十度，即係酸得滯。輕則食落口會起泡，好番唔會有咩後遺。但若果濃度再高，口腔接觸時間再長啲，有機會好番之後留疤，或喉嚨、食道起枕，令日後吞嚥時有障礙。」
撰文、攝影、攝錄：娛樂組
|
鍾意就快D Share啦！
|
|
|
