娛樂偵訊
蒙面彈起 側田踢館《歌手》 張敬軒臨門獲審批
有助人氣的湖南衞視歌唱比賽節目《我是歌手》，令不少中、港、台、韓等地歌手爭相參賽，反應熱烈；節目已播到第五季，因為內地「限韓令」被迫停播。
上有政策，下有對策。據知，節目已改名為《歌手》再出發，並於本月廿一日播出，賺人仔要緊的林憶蓮打頭陣，還有蕭敬騰、林宥嘉等台灣幫，曾參加《蒙面唱將猜猜猜》的側田，被大會安排以踢館身份三月出擊，張敬軒因今年橫掃各大樂壇男歌手獎項，由本來的不獲審批，變為順利參賽，內地節目準則果然變幻莫測！
已拍宣傳片
《我是歌手》播出至今，帶挈不少歌手例如鄧紫棋、孫楠、周筆暢、李克勤等在內地更上一層樓，新一季的歌手名額一如以往爭崩頭，本來已確定出賽，甚至拍好節目宣傳片的張敬軒，卻臨時被取消資格。
「之前《我是歌手 4》英皇已開始安排軒仔參加，不過當時佢因為黃絲味太重，過唔到審批；之後軒仔封口唔再講政治，早幾個月開始中、港兩地飛來飛去，為參戰準備，上個月仲飛埋去拍節目宣傳片，乜都搞好晒，預備今個月飛去長沙錄影。點知十二月尾突然收到大會通知，話軒仔過唔到最後審批，要 out出局。」知情者說。
有感而發
臨門一腳滑鐵盧，難怪張敬軒在剛過去的一月一日「叱咤樂壇頒獎禮」上有感而發。
「從今年開始，我嘅生活會變成減法，逐啲逐啲將自己減番去最初，即係 2002年啱啱嚟到香港，嗰種純粹好鍾意做音樂，去俾心機做音樂。」張敬軒說。
據知，英皇娛樂一度盡力再爭取，近日突然收到可參賽的通知。
「英皇為咗軒仔上到《歌手》，已經敲咗好多次門，上年仲俾埋容祖兒去玩，點知最後係咁！直到軒仔掃晒咁多個樂壇嘅男歌手獎，先俾佢參加，真係估佢唔到。」
林俊傑棄權
天后級的林憶蓮就以重點參賽者在名單之內。
「冇人諗過憶蓮會玩，所以亦係個有號召力嘅人選。仲有上年上過《蒙面唱將猜猜猜》嘅側田，佢個情歌小王子形象喺國內好 hit，大會安排佢喺今年三月，以踢館身份出現，但要到時先知 PK邊個。
「本來大會想搵林俊傑，不過佢經理人唔想佢參與太多同類型節目所以推咗，今年都多台灣幫，蕭敬騰、林宥嘉會陸續出現，另外仲有光良同內地歌手袁婭維等。」知情者說。
撰文、攝影、攝錄：娛樂組
|
鍾意就快D Share啦！
|
|
|
