現年61歲李國麟喺1974年加入無綫藝訓班，同期仲有杜琪峯、劉仕裕、黃杏秀、潘嘉德等，但大家唔係轉做幕後，就係退休，得番李國麟堅持幕前演出。呢位「綠葉王」喺大台演過逾百部劇集，忠角、奸角、搞笑、悲情乜都得，可惜就係冇機會擔正。不過，機會幾時都係留畀有準備嘅人，近年李國麟返大陸拍劇好吃香，最近有部大陸網劇《超能少年三部曲之宿命之戰》搵佢做主角，poster張相佢佔咗1/3，雖然得大頭，但剩係對眼已經好有戲，旁邊圍住一班大陸新演員，仲有香港人認識嘅曾偉權同黃榕。李國麟日前接受傳媒訪問，講到張海報搵佢做主相，佢笑笑口話：「係咩？！咁俾面呀！(係咪第一次做主角？)唔係，上面(大陸)都幾密吓，係TVB啲poster唔係好預我之嘛，哈哈哈。」呢部網劇於大前日（9日）開播，前日喺深圳搞咗發佈會，但李國麟話自己忙到分唔到身，佢解釋：「聽講仲想上院線，佢哋話一定要見到我，但TVB又要我畀期，o依家開緊3部劇，殺到2月幾又開《溏心風暴3》……因為公司真係唔係幾夠人，得嗰幾百個演員，係用得嘅大家都知邊啲……但我又見過有啲質素、唔曳嘅演員幾個月冇嘢做，最高記錄8個月都有，我都唔知點解？」李國麟又話自己仲有幾部劇未出街，加埋演緊3部及即將拍嘅，隨時黃金三線劇都會見到佢：「係，TVB安排好曳，大家有留意，一個演員如果幾重戲，隨時會令觀眾睇到混淆，我以一個觀眾立場就覺得好有問題，作為一個擁有龐大財產嘅公司，係糟蹋咗。」
|
鍾意就快D Share啦！
|
|
|
