謝清海曾經喺惠理基金最高價沽貨，眼光咁準，佢話細價股同價值股而家值得買。
中環人語
2017會股災？ 謝清海：現時非常危險
2017對於股民來講，係心驚驚嘅一年。有個講法，逢 7字尾年份股市都凶多吉少，包括 87、 97同 2007。有無咁邪？
小宗搵來「股壇金手指」、惠理基金創辦人謝清海指點迷津，佢就經電郵咁樣答：
「我不信以『 7』結尾的一年，會更可能發生金融危機。但我確信對投資者來說，現時已經非常危險，遲早會有另一場危機。但是，預測這種危機何時發生，並不可能。照目前情況，各國政府和中央銀行似乎仍有資源，來保持金融市場的穩定。」
謝清海淡淡定，當然有錢剩。他曾經喺惠理基金最高價時沽貨，絕非浪得虛名。佢對人仔嘅睇法亦相當獨特，認為只是短期波動，中、長線轉弱的應是美元，「美國經濟基礎比中國弱，中國有盈餘而美國有赤字。在中長期來看，美元應該更弱。不過我自己對貨幣的信心，不是很高，建議投資者把部分資金投入黃金。」
對於股票，他今年亦有心水推介：「石油和農業板塊正在復甦，我預期更高的通貨膨脹即將來臨。另外，近年細價股和價值股被低估，比起受追捧的大型股票，它們便宜太多！我認為現在值得購買。」對物業他則有所猶豫：「出現投機。當全球利率開始上升，我對香港和世界各地的物業轉趨保守。」謝清海強調，「價值投資」仍是最佳方法，迷信不如信自己！
甜甜遺產有異動
自從小甜甜過身、陳振聰坐監，甜甜揸住嘅遺產仙都唔仙吓，股票搏佢賣盤等同於坐艇。今年終於有運到，安寧控股（ 128）賣咗大部分中巴（ 26）股份俾一個基金，套現一億。基金佬話，甜甜遺產管理人採守株待兔方式，有人敲門就賣資產，無人敲門就繼續等。間公司最值錢嘅就係現金，截至去年中，安寧持有現金及定期存款 4.2億元，加埋出售中巴的 1億元，即是約 5.2億元。而家資產淨值 8.8億，加埋 6億元殼價，計番每股值 9毫，較目前股價 6毫折讓五成！安寧有可能派特別股息，洗乾淨個殼就賣俾人。
中環寸嘴 半島 150周年同佢贈興
半島酒店 Gaddi's個 Chef Table都搞咗十幾年，吖，我成日諗到底踎喺個廚房入面食，有乜咁特別？究竟同大牌檔有乜分別？都係睇住個廚煮，碟菜都係一傳到位，跟住又同你傾吓偈，問吓：「啱唔啱食呀？夠唔夠鑊氣？」即管同老婆同埋海外朋友踩吓場先，睇吓半島一百五十周年，有乜 jackso！
𡃁仔時喺半島食過梳乎厘真係好大個，我一早柯打甜品師傅整個「古老版本」嘅甜橙酒薑味梳乎厘，直徑九吋闊， check吓個甜品師傅得到幾多真傳？兩個幾月前唔怕嘥時間，去 Gaddi's食個晏順便睇場，見到 Chef Table得張枱好似「五星級大牌檔」咁，叮囑半島到時要整啲裝飾，配合吓聖誕氣氛， simple but elegant咁啦。雖然喺廚房總係有限制，我一坐低都係忍唔住要「武術指導」，當場點醒咗佢哋可以搵啲假提子藤繞吓水管位，唔使咁 industrial工業化嘛，硬係冇我兒時歐美味道！不過個 Sommelier嘅 wine-pairing，以香港水準計屬一級嘅，班到罕有嘅半支裝 Burgundy，呢個純粹係公司個酒庫實力雄厚，面子夠，貨源都醒啲吖！
半島都 promote得個廚 Xavier Boyer好緊要，四道菜加甜品，食到好飽晚飯都慳番，成餐晏食足近三粒鐘，不過從女性角度或者老人家角度出發，就少咗啲瓜菜，正所謂麻甩佬食量，未能掌握到各階層食客嘅需要，可以加以檢討。我好欣賞東南亞個總廚都來同我打個招呼。
楊國佳
工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。
俊和兄弟執爛攤
香港老牌建築商俊和（ 711)兩兄弟彭一庭同彭一邦，三年前賣走伯爺間公司，點知上年又買番。小宗記得當年大劉以每股兩蚊賣走愛美高，再用七毫子買番，賺到笑，彭氏兄弟就無咁好命喇。
佢哋一四年以五億六千萬賣盤俾中資新維投資，新維入主期間，引入第二間中資中城建做第二大股東，內部之後就立立亂。一五年俊和向中城建買入一幢珠海商業大廈，點知年尾反口取消交易。上年俊和再話同呢個第二大股東中城建，合作喺沙田起樓，中城建財困無錢俾， project又煞停。告到上高院之餘，公司仲改埋名做亞洲聯合基建，多次滲出兩大股東已反轉豬肚。
新維掌舵兩年間，俊和總負債由十七億升到廿七億。亦有唔少負面新聞，建築工人臨新年被拖糧搞罷工。興建屯門「菁雋」劏房盤，發表偉論話參考學生宿舍係好感動，未聽過有家長投訴學生宿舍坎坷。咁樣講，同中海外賣樓包埋垃圾房，有咩分別？
最終彭氐買番俊和，馬上煞停新維嘅供股計劃，指公司夠錢發展。而要炒俊和老臣子嘅計劃，當然亦取消。今次彭氐除咗用九億回購番間公司外，仲有排執呀！
|
鍾意就快D Share啦！
|
|
|
