娛樂偵訊
李亞男要生 B 《老表》王祖藍趕工造人
密返內地掘金的王祖藍，最近回歸大台，為自己有份編劇的無綫新劇《老表，畢業》開工；要兼前顧後，仲要「交功課」俾一直恨生 B的李亞男，王祖藍惟有開 turbo，兼且推晒所有春晚邀請，安排同老婆農曆年出埠，再度蜜月，甜蜜造人！
放假回氣生 B
《老表》系列收得，最新一輯《老表，畢業喇！》，王祖藍繼續坐鎮度橋外，更加拉咗不少老友埋位，包括蔡少芬、郭晉安、欣宜同林欣彤等，為新劇加強陣容，省靚自己個招牌。
早前王祖藍孖住郭晉安、泰臣等現身上水假日農莊為新劇趕工，雖然是日要搶拍多個場口，但大家都非常專業，大部分一 take過，省下不少拍攝時間。
空檔休息，祖藍拉住拍檔郭晉安雞啄唔斷，其間，郭晉安頑童上身，搞到祖藍一面泥，演員合作得順，開工輕輕鬆鬆！
「祖藍因為要度橋同負責大部分幕後工作，佢習慣事事親力親為，所以自己只係做個戲份極少嘅角色。不過祖藍想過年陪吓老婆，佢一早同導演傾好，喺農曆前先拍晒佢啲戲份。其實李亞男一直都想快啲生 BB，所以祖藍都話忙完呢套劇，要休息吓先，儲番啲精力，同老婆造人交差！」一名劇組工作人員說。
捱義氣頂上
王祖藍原本計劃新一輯《老表》由原班人馬演出，但有部分演員度唔到期，要重新編配角色人選。
「今次劇本出得比較急，開始埋班搵人嗰陣，祖藍已經呻過話好大壓力，好似張繼聰要陪老婆（謝安琪）生 BB，今次只可以客串，而王菀之又因為要開演唱會，冇時間兼顧拍劇，好彩最後都搵到蔡少芬頂咗要做舞台劇嘅萬綺雯，仲有臨急臨忙仗義幫忙嘅欣宜，大家都好支持祖藍。」劇組工作人員說。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
