藝人傅嘉莉(Kelly)趁今日年初一，祝東網讀者萬事如意，心想事成。Kelly日前到旺角花墟買花應節，於無綫新劇《財神駕到》中首次擔正女主角的她笑言，想買桃花催旺觀眾緣：「我擺開植物，屋企必有三種唔同花草。我以前覺得唔需要擺桃花，但今年想試買！聽講要由細棵買起，下次再買大棵啲。因為我希望人緣好啲，唔一定指異性緣，想多啲人鍾意我新劇角色！」
自稱冇人追
提及桃花，Kelly透露家中長輩雖未催婚，但其爸爸渴望抱外孫，只是自己決定以事業為先，故講明新一年謝絕異性追求，將成家立室的重任交畀哥哥「頂住檔先」：「2016年太多誤會，（有人追會拒絕？）會say no，但我唔會講得咁明確。（目前有人追？）冇，可能我完全感覺唔到。（父母有冇催婚？）佢地都希望我幸福，但知道我係個工作狂。所以我將家庭重任交畀哥哥，叫佢快啲結婚，頂住檔先！因為我爸爸好鍾意小朋友，（佢想抱孫?）佢好恨呀，成日玩人地隔籬鄰舍啲孫。」
提及Kelly於賀年劇《財》首度升呢做女主角，她直言感到受寵若驚，更為此「搏到盡」日日只瞓兩個鐘：「係好大嘅禮物！（等咗好耐做女一？）比我預期中快，多謝公司畀機會我。就算我做較次要的角色，只想出黎有不同印象，唔係淨係女主角先係我方向。（有壓力?）每次開劇我都會跑步同游水去盡量訓練好體能先入組。拍劇期間仲拍埋另一部劇，通宵拍完一部就出去拍另一部。我試過連續兩個禮拜日日瞓兩個鐘，收工沖完涼，抖一陣又起身返工。」認真敬業！
CREDIT:
傅嘉莉髮型:Ray Mork@Fifth salon
場地及花卉提供:Brighten繽紛
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|