自認係為食貓的無綫咪神張秀文，新年都會狂掃賀年美食，最喜歡吃蘿蔔糕，家人每年新正頭必定會買鯉魚，取其年年有餘意頭，難得秀文食極唔肥，問到其Keep Fit心得，她笑說：「我個人比較緊張大師，會諗好多啲，加上好鍾意講嘢同埋大笑，運動量都好大，加速新陳代謝！」
增值自己
秀文趁新春佳節品嘗精緻賀年菜式，當中她對一味鵝肝帶子情有獨鍾，大讚美食冇得頂，並希望雞年食得是福、財源廣進、心想事成、日日開心！講到雞年大計，去年秀文開始有更多機會拍電影及拍劇，她希望新一年能繼續發揮演技：「以前會擔心，唔知自己應唔應付到，但依家覺得對演戲好有興趣！（主要係性感同搞笑戲路？）係，通常監製唔會搵我只係性感騷身材，會有啲性格騷出嚟，我亦都希望可以搞笑令大家開心，就好似一碟菜入面嘅糖一樣，令大家覺得好Sweet！另外我都希望有時間可以增值自己，例如上演戲、跳舞同語言課程。」
後生未恨嫁
桃花運方面，秀文笑言今年要落力催旺，因為去年的桃花運實在太差：「唔好話爛桃花，直頭咩都冇！可能我個人太宅，冇乜心機去識新朋友，今年個人會開放啲去識人，其實識多啲知心朋友對各方面都係好，可以喺人哋身上學多啲嘢！（冇人追？）唔知呀！完全冇留意，今年要花啲眼力望清楚。（恨唔恨嫁？）又唔恨，哈哈！我仲後生，而且要好審慎做呢個決定。」
沖太歲未必壞事
肖兔的秀文今年沖太歲，但她聽風水師麥玲玲說沖太歲並非壞事，代表會有新的轉變，她亦希望事業及桃花也有好的突破，問到有何方法催旺桃花？她笑說：「我聽人講話如果馬桶沖廁時唔冚蓋，可以催旺財運同桃花運，因為啲水不停流不停轉，咁我屋企廁所都乾淨，可以試下。」
髮型：Vince Pang@IL COLPO Platinum
場地：粵桂樓@FOVEA
鳴謝：Barry@Oneness
|
鍾意就快D Share啦！
|
|
|