謝賢再當爸？霆鋒探口風遭爆粗開年
中韓兩大型男謝霆鋒與鄭容和Chok爆賀雞年，齊齊於年三十晚獻上中國及韓國的傳統賀年食品，預祝各位雞年豐衣足食、心想事成！不過霆鋒未到新年就被爸爸謝賢「開年」，他稱早前指使妹妹謝婷婷問爸爸是否即將再為人父，被謝賢以一句「黐X線」回敬。為新片苦練四個月刀工的鄭容和則「臨尾香」，近電影煞科時切到手受傷。
型男謝霆鋒及鄭容和近日連走幾場宣傳新片《決戰食神》，前晚現身銅鑼灣出席慈善首映禮，人氣極高的鄭容和幾乎每做一個動作、說一句話都惹來粉絲吶喊，二人又在海報前擺同一甫士任影，Chok爆冧粉絲！霆鋒表示首次在廚房見到鄭容和就知他是專業演員，讚其刀工絕不是不常下廚的演員所有，大讚他在拍攝前做足準備。擔任新片美食總監的霆鋒，對食材又相當嚴謹：「現場啲光好熱，熱到係可以烤熟條魚，每拍完一個鏡頭就要換魚！」問到會否考慮開餐廳？他直言不會，因以他的性格會24小時盯實餐廳，加上做客席廚師較自由，有更大創作空間，更透露想將飲食與影視結合。
「黐X線」回敬
談到爸爸謝賢早前被指將為人父，霆鋒無奈地笑一笑表示有聽過，又直言好笑，更派妹妹謝婷婷問爸爸是否真有其事，不過就被謝賢以粗口回敬，至於是哪一句粗口？霆鋒做口形表示：「黐X線！」記者指父子二人十分風趣，他說：「你係話我風趣定傳嗰個人風趣先？（你聽到嗰陣咩反應？）咪佢同我講嗰句一樣囉！」
鄭容和則表示拍攝前根本不懂下廚，事前自行練刀工四個月，他自言非常謹慎一直未有受傷，反而是拍攝電影的後期，以為刀法熟練卻不慎切到手，正宗「臨尾香」！問會否找一個懂得下廚的女友？他說：「冇所謂，可以互相煮吓！」
兩位型男特別在年三十晚互相介紹兩地的賀年菜式，霆鋒推介油角及糖冬瓜等小食，寓意新一年荷包有如油角脹卜卜，而糖冬瓜則寓意好頭好尾，在新一年工作順利、事事順利。鄭容和則介紹韓國傳統食物年糕湯，象徵新一年開始。二人對對方的賀年食品並不陌生，鄭容和指韓國亦有類似油角的賀年食品，以米通做成，寓意帶來幸運，霆鋒則表示聽過韓國人過年必食年糕湯，吃過年糕湯寓意大一歲。
型男派利是
拍攝電影期間日夕相對，他們均表示印象最深刻是一場飲酒傾偈的戲份，鄭容和認為內心戲較重，更飲啤酒飲到肚谷谷，而霆鋒則沒有飲，因為一飲就面紅！談到新年願望，霆鋒希望事事順利，鄭容和則希望新片大賣！
另外，霆鋒昨日在社交網上載向員工派開工利是的片段，員工一見型男老闆即笑到見牙唔見眼，更捉實霆鋒影合照，戴Cap帽配黑超Chok爆的霆鋒來者不拒，親民到爆！
文：影視組
|
鍾意就快D Share啦！
|
|
|
