八九十年代是香港娛樂圈電影圈最蓬勃的時期，亦是車保羅(Paul)出道以至成名的日子，拍過《第一類型危險》、《香港也瘋狂》、《審死官》等作品。那時候這位外型獨特的綠葉戲接戲，廣告接廣告，風光得意；而03年約滿無線後卻跌落谷底，走投無路要領取綜援，外孫女亦發生交通意外，坎坷失意。試過高低起跌嚐盡人生百味，阿Paul仍然覺得自己很僥倖，「可以做回一個人」。記者：余傲芝、戴彩煥 攝影：馮峰、Neo、陳慧安「嗰時啱啱同無綫約滿，佢哋就話換另一方式續約，一年二千蚊底薪，我咪算數，寧願走出去啦。」加入失業大軍的Paul， 嘗試應徵不同類型的工種，卻因演員身份而不獲聘用，「一句大明星喎請你唔起，咁就冇啦。」所以他就領取了數個月綜援，後來朋友知道他如斯境況，就介紹他工作。曾經遠走他鄉打工，亦試過做保安、地盤雜工等勞動工種，阿Paul說雖辛苦兼收入不穩定，但總好過坐在家中等運到。要走過這段落魄的日子其實一點也不容易，還是承受真真實實的人情冷暖。「最現實嘅係有一個副導演，我結婚時佢又出車出人，乜都入佢數。但到我出現咗問題想借五千蚊，佢就三日都冇回覆，過多一個月再打電話俾佢，佢冇聽，咁我就明白啦 ─ 你跌落谷底，仲借錢俾你咪即係掉落海，所以登天難，求人更難。」話雖如此，阿Paul身邊還有一個雪中送炭的朋友，他就是以前的拍檔「肥施」施介強。肥施現職港台監製，與Paul雖未有時常見面，但會久不久就打電話問候，「佢(Paul)有咩戲我都會追睇，佢之前都有好多不幸事，我都會打電話比佢，之前真係俾佢嚇親，個個都問我佢係唔係走咗，我即刻打比佢，好彩佢有聽咋哈哈。」二人雖好久不見，但一拍即合，默契仍在，拍攝時配合得天衣無逢。肥施坦言相比起阿Paul，自己比較幸運，「或者個天知我承受到幾多苦難就俾幾多我，佢承受咁多，將來會有回報」今時今日的阿Paul在博愛醫院董事局做全職雜務的工作。有時候要穿晚禮服做接待員，有時候要做解款員監護善款，有時候要走遍全香港九龍新界離島送貨，「你可以叫我車總理，乜嘢都要理，哈哈」。雖然樂觀積極的阿Paul已經面對現實，沒有再留戀以前風光的日子，但仍然喜歡演戲。「做演員，就好似食毒品，拍戲嗰時就似上電，我哋已經上咗癮啦。不過回頭一睇，今日有收入，聽日又唔知咩境況啦，我寧願繼續做我嘅工作。」談到夢想，阿Paul笑謂「冇咩夢想啦，夢想就係希望送一粒鑽石俾老婆，呢個承諾我經已講咗廿多年啦，俾膽石又話唔要哈哈。」
|
鍾意就快D Share啦！
|
|
|
