韓國天團BIGBANG首次喺香港啟德郵輪碼頭舉行戶外騷，今日頭場剛剛喺晚上9點03分圓滿結束，歷時兩小時15分鐘嘅演唱會亦順利完結。雖然開場前因為入場安排等問題，搞到粉絲要排幾個鐘先入場，其間搞到附近交通好擠塞，同時大會入場時安排亦好混亂，遲來反而有得先入，令到好多粉絲都好不滿，喺網上狂熱鬧，幸好最終大部份觀眾都成功入到場內欣賞演唱會。而觀眾吸取過入場時嘅教訓，離場時就都即刻走人，唔再等大會安排嘅專車接送，大部份觀眾都寧願選擇行路出去，以免再經歷塞車之苦。當中仲見本地組合天堂鳥嘅兩位成員到場，佢哋完騷後受訪話：「我哋5點半先到，幸好啱啱趕及6點半先入場。」佢哋覺得最正係last三首歌，不過亦都彈今次演唱會安排麻麻，又呻：「未試過搞完一大輪入場要成兩個鐘，可能第一次喺呢個場搞，個入口太細，咁多人迫埋一齊入，唔係太好。」而今日下午有得喺VIP區搭專車嘅阿Sa同馬天佑，離場時就唔想再等，都即係搭小巴走人，阿Sa為免被認出，仲帶上黑色口罩，阿Sa喺Instagram上載同馬天佑合照，之後留言：「有史以嚟睇得最辛苦嘅一埸演唱會...今日本身自己有啲唔舒服...頭先睇睇吓show爭啲暈低...唯有早...行咗好遠終於搵到小巴...但都等咗一陣先至有車...見到隔離等的士嗰啲人就慘喇..半個鐘都冇一架的士...唔知而家散咗場有冇多番啲車呢？」其他粉絲走人時受訪都覺得今日安排好混亂，Krissy同Lalle受訪時話佢哋入來時唔係好混亂，只係等咗好耐，而且去邊區現場都冇指引，佢哋入場全程等足個半鐘，佢哋都慶幸自己冇搭大會嘅車，唔係等得仲耐。Krissy話佢有去過韓國睇騷，覺得場地香港場地比韓國好好多，如果行人通道加闊返少少就好。」本身由BIGBANG一出道就成為粉絲嘅Penny都話今日非常混亂，排兩個鐘先嚟到會場，排緊隊都唔知做緊乜，又指現場音響唔係咁好，同時覺得今次門票太貴，但覺得都係值得，只係希望BIGBANG可以唱多幾首舊歌。另外，觀眾都乖乖咁以步行離開會場，現場都唔覺混亂，而沿途都有人賣有關BIGBANG嘅產品，引來不少粉絲圍觀。
|
鍾意就快D Share啦！
|
|
|