新年快樂！我Nuts哥祝大家身體健康，心想事成，男嘅靚仔有台型，女嘅索爆有S身形！做藝人嘅，想吸金吸到手軟，梗係想有大批粉絲狂追狂捧！Love=Money，粉絲等於魚翅一樣，即係愈多粉絲，藝人吸金力愈高。當然追星追到失晒暈大有人在，好似早排有個女粉絲成日喺周柏豪嘅網頁留言逼婚，仲話如果唔同佢結就搵另一個！鍾欣桐都唔弱，有個內地死忠粉絲「番禺007」，由廣州追到落嚟香港，每次見到阿嬌高叫話：「你嫁畀我啦」、「阿嬌，我請你食蕉」！搞到阿嬌不知幾尷尬！呢個粉絲都唔算犀利，當年導演爾冬陞畀一名女粉絲滋擾苦纏，搞到要申請禁制令保持五十公尺距離！
我Nuts哥識咁多巨星，真正對粉絲好兼攞個heart出嚟嘅，真係十隻手指數得晒！好似早排嚟香港開騷嘅台灣天王周杰倫，當住成萬名觀眾向一名男粉絲話：「今晚請你吃飯！」牙齒當金使，周董真係「找數」，騷後同呢位男粉絲「消夜男」撐枱腳食「撈丁」兼Post埋合照，搞到一地葡萄！
精神領袖見證起跌
查實呢碗「撈丁」真係貴，皆因十六年嚟那怕天涯海角，為支持周董，「消夜男」幾乎風雨不改逢騷必撐，咁多年嚟合照都冇影過一張，但總之有周董就有佢，聽聞今次巡唱「消夜男」已經睇咗至少九場。有數得計，周董出道以嚟開咗超過二百場騷，當平均票價一千蚊咁計，「消夜男」只係睇八成嘅話，單係買飛都要使16萬，仲未計酒店機票早、午、晚三餐呀！使咗十幾萬換到同周董撐枱腳食「撈丁」，唔好問我值唔值，「消夜男」話十六年嚟被親朋戚友猛問追住周董為乜，但佢覺得追嘅唔係星，而係一種精神！的而且確，周董真係一群八、九十後嘅精神領袖，個個都係聽佢啲歌長大，無論係失戀、熱戀、考試肥佬、畀老闆鬧等等人生起跌都好，都係喺周董嘅歌聲下度過，可能聽完佢啲歌，會喊得更大聲、更淒涼，但對唔少人嚟講，反而覺得係一種安慰同鼓勵。
如果你話「消夜男」追周董十六年好犀利，當晚同周董合唱《一生中最愛》嘅樂壇校長譚詠麟更加唔嘢小！所謂有阿倫就有肥萍，人人都知阿倫有一個跟隨自己三十年嘅女粉絲肥萍，唔單止阿倫自己都講笑話：「他日若果無伴終老，點都有個肥萍！」就連阿倫媽媽都講過：「想知阿倫喺邊？問肥萍」
只願一生跟佢走
今天憶當初，我只愛你一個，話說肥萍當年十七歲卜卜脆時，喺電視見到阿倫就一見傾心，自此芳心暗許，只願一生跟佢走！眨吓眼就三十年，激情捉喺手裏面未必化為灰燼，肥萍同阿倫依家好似老夫老妻一樣，大家都習慣有大家嘅存在，就好似刷牙洗面一樣成為習慣，噓寒問暖，互相關心，阿倫都講過見唔到肥萍先至奇怪！肥萍就好似阿倫嘅「三奶」咁，愛屋及烏嘅程度，淨係講當年佢陪埋阿倫嘅爸爸去洗手間就知為阿倫放棄過兩段感情嘅肥萍，都諗過為咗阿倫更鍾意自己而去減肥㗎，但諗落肥瘦都已經唔重要，見到阿倫開心幸福先至最實際！雖然好多人都話，肥萍依家已經有「新歡」鄭俊弘，有鄭俊弘嘅場合都會見到佢，其實佢咪好似譚校長咁一樣，幫吓手推動吓樂壇，博愛都冇壞啫！
|
鍾意就快D Share啦！
|
|
|