二人當街開火，其間朱晨麗激動到出手摑坤哥。
探熱針
儲定首期上車 坤哥當街捱摑
今年初，坤哥吳業坤冧庄擊敗陳柏宇再摘《叱咤》男歌手，之後再下一城，憑電影《幸運是我》入圍角逐第 36屆金像獎最佳新演員，大台把握機會咬住唔放，除了正在播放的劇集《迷》拍住視后田蕊妮做男二，再安排連踩兩劇，開工無停手！
早前坤哥孖住朱晨麗現身旺角為新劇《超時空男臣》拍外景互罵，為咗早日達成業主夢，坤哥當街捱摑，一樣面不改容。
打甩眼鏡
屋邨仔出身的坤哥，在新劇《超時空男臣》飾演富二代外，「穿越」劇情仲要做埋的士大佬，一身麻甩造型的他，拍住朱晨麗拍外景，導演一嗌 roll機，「兩公婆」即時入戲，駁火對鬧。其間，朱晨麗激動到出手，一巴摑過去，搞到坤哥眼鏡差啲跌！被評成日遊魂的坤哥，當日亦打醒十二分精神，拍完每個 shot都緊張埋位睇 playback，之後輪到蕭正楠及曹永廉落場，他亦企埋一邊偷師，唔願收工。
儲定首期
人紅收入升，毒 L坤哥如今出騷身價十級跳，有望買樓上車，更投身商界做老闆賣西裝。
「坤哥話自己上年已經儲咗過百萬，平平哋嘅二手樓首期一定夠俾，不過佢想再睇定啲，所以而家仲喺大圍租樓住。不過坤媽都不停响出面搵緊心水單位，一得閒就捉坤哥去搵經紀睇樓！」知情人士透露。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
