整條假刀疤的游學修（左二）唔用替身，同班特約演員齊齊在戲中曬月光，上演少年犯每日都要剝光豬驗身的真人真事。
娛樂偵訊
游學修露股 揭青少年囚犯非人生活
出道四年的游學修，在新片《同囚》露股上陣！電影只是蚊型製作，他仍唔錫身「犧牲色相」，一「股」勇氣，只為揭開青少年囚犯一幕幕鮮為人知的「非人生涯」。
唔敢打底
游學修將「後欄」曝光，但原來，重要部位的正面一樣冇遮冇掩。
「本來諗住打底黐啲嘢，點知有啲特約（臨記）乜都冇搞豁出去，加上副導係咁催又惡死，個個 ready好，仲搞人哋會以為我耍大牌，哈哈！咁是但啦，索性唔打底，只係叫班女手足出去。
「場露股戲講班青少年囚犯每日要當眾剝晒衫褲俾教官裸檢，仲要做埋好多動作，例如舉手伸脷之類，係反映真實一面，劇情需要，所以我唔介意露晒。」游學修說。
至於何以不用替身，他鬼馬回應：「呢個等我再紅啲先。」
真人真事
戲中游學修飾演的青少年囚犯角色「阿丹」，是真實人物，本名麥以馬，已出獄並改邪歸正多年；麥以馬更在片中與游學修同演囚犯，睇住他做番自己。
原裝在陣，游學修說從對方身上始知青少年囚犯的牢獄生活是如此不人道，更有部分教官會執行「極端家法」。
屎當牙膏
「過往對監獄嘅理解係以為好似平時睇戲嗰啲，但原來青少年監獄係另一個世界，簡單啲講，連傾偈都唔可以，起身到瞓覺都唔出得聲。令我最驚訝一幕係廁所一場戲，講個教官為咗玩你，話擦唔乾淨個廁所就要你食屎，侮辱你。我飾演呢個真實人物，入冊兩日已經頂唔順自殺。
阻嚇與人道之間
我有問佢（麥以馬）當時諗緊乜，尤其喺佢自殺失敗後點面對餘下日子，佢話喺呢個咁變態咁強權嘅環境生存，其實都係一個社會縮影，所以猛同自己講，只要呢度捱得住，出到去冇話捱唔住，因為阿 Sir可以無啦啦質你一拳，仲要你講 Thank You Sir！」游學修說。
親身經歷
電影《同囚》的內容，戲中內容是一班過來人真實經驗，其中包括有份演出、曾犯事判入勞教中心的麥以馬及劉萬豪等自身經歷。
廿四小時唔准傾偈
「基本上廿四小時都唔俾傾偈，夜晚返到倉都要好細聲好細聲咁傾，因為俾人捉到就大鑊，點罰睇阿 Sir心情，除咗體罰，會喺評級表現俾個 D你， D即係加長刑期，我哋好怕收到呢個，所以寧願用手捽屎刷牙都唔敢反抗，留喺度多一個月，都好恐怖。」
擦唔乾淨廁所罰食屎
游學修在戲中食屎情節，麥以馬說是另一獄友經歷。
「係我入冊時，聽到隔籬倉另一個少年犯嘅經歷。阿 Sir話佢洗唔乾淨廁所啲屎漬，於是叫佢用手指再擦，擦完問佢今日刷咗牙未，佢答未！跟住個阿 Sir叫佢用染有屎漬嘅手指刷牙。」
忍到瀨受體罰
受刑期間，雖然一日有早、午、晚三個如廁時段，但有唔等於可以用；因為要等教官巡倉，然後舉手申請，但若不獲批准，忍到瀨便要受罰。
「雖然監倉裡面有廁所，但唔獲批係唔准用，俾佢發現偷偷用或者瀨咗就大鑊，罰你捧住篤屎到日落已經係阿 Sir錫住你，重嘅要體罰，例如趴低俾阿 Sir喺你背脊批踭，或者用拳骨批你肋骨位，好痛㗎。」麥以馬說。
比死更難受
游學修飾演的真實少年犯叫麥以馬，現已 32歲。 18歲因襲警被判入沙咀勞教中心，服刑兩個月。但入冊兩日便選擇自殺。
「當時我係新人組，第一日入去只係坐喺度望吓佢哋生活，有啲犯我以前識，但見到佢哋趴低扮青蛙，伸脷出嚟俾阿 Sir餵藥，或者踎低俾阿 Sir當櫈坐。我第一日喺指模房因為講咗句：『阿 Sir，呢個字打錯咗！』就係咁要捱打，其他喺指模房工作嘅少年犯，就要不停咁講 Sorry Sir。我覺得好恐怖，接受唔到咁冇尊嚴，所以有一刻想死，選擇咬脷同撼頭埋牆，不過好快俾阿 Sir發現我有尋死舉動，㩒住我。
死唔去，惟有完全放低尊嚴投入嗰個世界求生存，有啲真係捱唔到，返唔到出去。游學修嗰幕露股，係服刑時每日要剝晒俾阿 Sir check吓你有冇傷勢，睇吓有冇俾其他犯打。好諷刺，就算有，都係因為佢哋（阿 Sir）。
父母嚟探監都冇用，試過有人向家人反映，之後佢咪俾人搵理由罰佢加長刑期，精神虐待到最後。
依家人大咗，好多事都有唔同睇法，但我始終唔認同用咁極端方法去教。當日離開勞教中心，我有一段日子好怕接觸人群，好難先擺脫嗰種恐懼。之後我有再犯事，直至十年前，我靠信仰返回正軌，重新做人。
撰文、攝影、攝錄：娛樂組
|
鍾意就快D Share啦！
|
|
|
