現年36歲嘅百億人妻熊黛林（Lynn），去年10月嫁郭可盈弟弟郭可頌，之後成日都俾人見到佢為頭家打點，咁好嘅老婆，今日係元宵節，後日又係情人節，唔知兩公婆準備咗咩活動慶祝呢？婚後趕造人嘅Lynn，日前由老公陪同現身上環「婦科聖手」，人稱「吉叔」嘅中醫師劉逢吉，被讀者陳小姐透過「爆相爆片」分享，而老公郭可頌全程小心翼翼扶實Lynn，絕對有可能一擊即中有咗BB。陳小姐喺電話表示：「嗰日大約5點，見到佢哋行入去藥材舖睇中醫，老公扶住佢，同行仲有一個女人。」問到點解覺得Lynn係懷孕呢？陳小姐話：「因為見到老公好細心扶實佢，Lynn又戴晒口罩，但個樣唔似病，醫師係咁同佢哋講嘢，又教佢哋煲藥，見佢老公好似好開心，唔知係咪真係有BB呢。」之後Lynn一行三人去日本城，陳小姐見到佢哋入去買藥煲，然後再返藥材舖攞幾劑執好嘅中藥，醫師再同佢哋傾咗一陣，之後佢哋就上車走。問到呢位醫師係咪婦科聖手？陳小姐話：「我唔清楚，都係第一次見到Lynn，自己平時嚟買嘢啫，但見到好多人排隊，都有一兩個大肚婆，應該幾出名。」《蘋果》向Lynn求證係咪成功懷孕？但截稿前未有回覆。婚後積極想生B嘅Lynn，一直有調理身體做好準備，雞年願望仲係生B㖭，之前個肚遲遲冇動靜。Lynn曾經同Angelababy討教生仔秘方，點知Baby咁答：「懷孕好簡單！」叫佢要放鬆啲，唔好咁大壓力。早前Lynn出席活動，被問到佢阿嫂最近生咗龍鳳胎、咁佢想唔想誕孖B？Lynn笑笑話：「我唔知道有冇咁好彩，可以一次就搞掂，但生孖胎好辛苦，仲要先換間大啲嘅屋先。」
| （讀者陳小姐提供圖片） | | |
| | | |
|
鍾意就快D Share啦！
|
|
|
