李家鼎由武師化身做廚師，主持飲食節目《阿爺廚房》展現鐵漢柔情一面，吸納唔少師奶fans。日前鼎爺接受車淑梅《舊日的足跡》訪問，自爆當年點解會同施明離婚。有報導指鼎爺明知前妻施明患有哮喘，但都係屋企養咗好多雀，成為離婚導火線。鼎爺未有否認：「我畀嗰啲堪輿學家累死，話施明生肖同雞雀相沖，後來我連一隻雀都唔可以養。」鼎爺自覺一生最大嘅失敗就係離婚，回想19年嘅婚姻，佢從來冇提出過要離婚：「當年施明生日， ...
李家鼎由武師化身做廚師，主持飲食節目《阿爺廚房》展現鐵漢柔情一面，吸納唔少師奶fans。日前鼎爺接受車淑梅《舊日的足跡》訪問，自爆當年點解會同施明離婚。有報導指鼎爺明知前妻施明患有哮喘，但都係屋企養咗好多雀，成為離婚導火線。鼎爺未有否認：「我畀嗰啲堪輿學家累死，話施明生肖同雞雀相沖，後來我連一隻雀都唔可以養。」鼎爺自覺一生最大嘅失敗就係離婚，回想19年嘅婚姻，佢從來冇提出過要離婚：「當年施明生日，有學生打畀我話想學騎馬，佢唔開心暱埋入房，我想打開門，但竟然打穿咗個窿。自此佢就唔再理睬我，後來就提出離婚。」鼎爺想打開度門變成打爆度門，力度幾猛都想像得到，不過鼎爺話如施明所言，佢份人雖然粗魯，但從來冇郁過手，後來鼎爺先知施明唔睬佢，係因為有人借錢不遂，從中搬弄是非。面對感情缺失，鼎爺話最緊要大家能來得開心、去得瀟灑，佢話：「98年我曾經飛去美國求復合，但佢唔答應‥‥不過，既然成事實就唔再追究，我教泳豪(細仔)都一樣，『寧可天下人負我，唔可以我負天下人』係家教。今日我見到思琦都會打招呼，合作唔係問題。」鼎爺自覺不枉此生，因為前妻係美女，有兩個乖仔，o依家仲有埋個得意孫，而現任女友就成日埋怨因為被寵所以食肥晒，真係好冧！鼎爺話最大嘅心願係買一間屋，住得舒服啲，再婚就順其自然。鼎爺仲喺節目中講咗一啲有關做馬術指導時嘅經歷，救過汪明荃同鄭少秋一命。對於劉德華早前墮馬受傷，鼎爺直言呢個年紀起碼要休息半年先可以復原，由於唔方便探望，所以喺節目上送上祝福。
