天王郭富城向來以冇夫妻宮自居，簡單一句，冇腳雀仔，如何天香國色嘅女人都唔使旨意困住佢。世事無絕對，女友方媛（Moka）早排被人話肚凸凸疑似有喜，51歲嘅城城縱橫情場出「征」至今都未曾失守，照理大肚呢單料基本上都係流料一則，但點知城城竟然超激罕話想生小朋友組織家庭，咁樣先至係最幸福喎！嘩！舞台王者想做湊仔公？唔怪得我Nuts哥好多老友都拍晒大髀話熊黛林（Lynn）total loss，用咗七年時間「攻城」搞極都係企喺門口食西北風，方媛唔使兩年就搞到狂野之城承認女友地位兼齊齊放閃，依家仲開到口話會好愛護珍惜女友，真係對你愛愛愛不完！
計我話，唔好以為Lynn會唉唉唉不完，佢都執番個桔，唔使兩年就將郭可頌呢個筍盤封咗！今世有緣無分啫，但Lynn同城城前世前世前前世都一定有瓜葛，睇佢哋不時鬥放閃互相贈興就知你收到3卡求婚鑽戒咩， 我又帶Moka去買戒指；Moka疑似懷天王種，唔知點解Lynn又咁啱同老公去見「婦科聖手」兼傳話佢要安胎！
唔使唱《中女的祈禱》
Lynn經歷咗七年嘅「攻城」歲月，雖然青春冇咗， 皺紋眼紋多幾條，但係修成一身速入豪門嘅快打攻略！女人幾多錢都嘥得起，但千祈咪攞時間嚟嘥！ Lynn已經係人辦，搞咗七年軟硬兼施前鋒中場後衞連龍門都做埋，始終攻「城」失敗。梁朝偉都話啦：「三年之後又三年，十年都嚟緊啦老細！」何況講緊一個女人有幾多個七年又七年嘅青春畀你陰乾？真係楊千嬅都要改口唱《中女的祈禱》！ Lynn都三十有六，仲嚟唱《純真傳說》咩！所以Lynn一見到另一筍盤郭可頌，實行打「埋身戰」，由拍拖到結婚唔使兩年急急如律令極速收服郭可頌，依家喺老公送畀佢嘅千萬豪宅腳印印做「郭太」，得閒同城城過吓招！
收服男人身邊嘅女人
其實Lynn當年主動又進取，城城一聲愛的呼喚，就揸住架Mini Cooper，一人一狗一車，超過三十小時不見天日咁高調攻「城」慶生，簡直愛是全奉獻！經過咁多個鐘嘅榨乾榨淨，就連隻狗狗離開「城門」都攰到唔識吠咁滯！Lynn搵到郭可頌呢個筍盤老公，只係用咗當年攻「城」一成功力就嫁入豪門，呢招「快打擒金龜」，關鍵係收服一個男人，先要收服呢個男人身邊嘅一班女人，即係阿媽、家姐、細妹、姨媽、姑姐……冧得掂，入門成功指數至少有七成。雖然當時有話家姐郭可盈唔多like，但Lynn邊有咁易嚇窒吖，假假哋同「宇宙最強」甄子丹拍過三集《葉問》，葉問一個打十個， Lynn都識得打埋身戰，玩一招攻其要害，氹得郭可盈個寶貝女歡心，個女開心，阿媽梗開心！小朋友最天真無邪，鍾唔鍾意就最直接，寶貝女見到Lynn肉緊到錫錫錫，幫Lynn加晒分！郭家老嫩畀晒like，等如Lynn手執「Auto Pass」，入門直通無阻。交咗七年學費都學到嘢，Lynn先至大器晚成標咗個咁靚嘅尾會！話時話，Lynn係咪應該寫番張thank you卡送畀城城？
|
鍾意就快D Share啦！
|
|
|
