終於殺到埋身！英聯盃決賽今晚喺溫布萊球場舉行，由曼聯大戰修咸頓。曼聯今季愈踢愈好，近期5連勝勁到甩轆，伊巴、普巴入晒局，好多人都覺得，紅魔鬼將如願捧盃，領隊莫連奴可以攞到，執教曼聯後嘅第1個重要獎盃，今季向住5連冠進發！但修咸頓四強淘汰利物浦，表現都非常出色，今場冇壓力之下，或者有超水準表現。究竟魔粉最期待嘅畫面，今晚會唔會出現呢？睇住我哋戰情不斷更新，就一目了然喇！
【02:23】
全場完 曼聯3:2修咸頓
全場打完，曼聯今場形勢下風，但成為最終皇者，梅開二度嘅伊巴謙莫域係大英雄，帶領曼聯贏修咸頓3比2，今季捧第二隻盃！
【02:15】
87分鐘，曼聯一次反擊，安達靴里拉右路傳中，伏兵門前嘅伊巴謙莫域近門頂入，曼聯領先3比2，冠軍在望呀！
【01:37】
下半場開波4分鐘，修咸頓前場左路角球，曼聯中場保羅普巴頭槌解圍唔遠，「聖人」守將頂番入禁區，前鋒加比亞甸尼喺12碼點，於基斯史摩寧緊逼下，神級轉身快腳射入，「紅魔鬼」門將迪基亞得個睇字，追和2比2喇！
【01:19】半場完 曼聯2:1
計攻勢，修咸頓上半場的確稍勝，不斷為曼聯後防製造麻煩，仲曾經冤枉慘食詐胡；但曼聯就贏埋門質素，伊巴唯一一個機會，就射個靚罰球入網，跟手睇住對手狂攻伺機打反擊，連格空晒起腳又把握到。不過聖人完半場前入番粒，下半場仲有得追！
【01:16】
加比亞甸尼嚟料！門前篤入追番1粒，捧盃仲有價講！
【01:16】
計攻勢，修咸頓上半場的確稍勝，不斷為曼聯後防製造麻煩，仲曾經冤枉慘食詐胡；但曼聯就贏埋門質素，伊巴唯一一個機會，就射個靚罰球入網，跟手睇住對手狂攻伺機打反擊，連格空晒起腳又把握到，帶住2球優勢返更衣室。換邊後聖人一定要沉住氣，入番粒嘅話唔係冇得追！
【01:09】
2:0喇！連格於18碼點空晒，佢冷靜射個地波入網，紅魔鬼贏到2粒喇！
【01:05】
35分鐘，修咸頓繼續狂攻，角球攻勢下搞到曼聯後防一片混亂，曼聯血肉長城頂得住
【12:58】
28分鐘，禾特普斯禁區頂地波一抽勁靚，可惜畀迪基亞飛盡救出
【12:50】
19分鐘，伊巴右腳主射罰球搞掂呀！曼聯打開紀錄！
【12:40】
11分鐘修咸頓發威，加比亞甸尼門前篤入，但被判越位，但佢本身冇越位，只係遠柱嘅隊友有越，呢個詐胡堅食得唔抵！
【12:35】
普巴遠射中龍呀！曼聯一開波係威係勢，普巴超遠勁射，可惜角度太正被救出！
【23:30】雙方決賽正選陣容
曼聯
門將：迪基亞
後衞：路爾斯華倫西亞、艾歷拜利、基斯史摩寧、馬高斯盧祖
中場：桑馬達、連格、保羅普巴、安達靴里拉、安東尼馬迪爾
前鋒：伊巴謙莫域
修咸頓
門將：費沙科士打
後衞：薛迪索拉斯、積克史堤芬斯、吉田麻也、賴恩貝特蘭
中場：列特文、奧里奧爾羅美奧、杜辛泰迪治、史提芬戴維斯、禾特普斯
前鋒：加比亞甸尼
東網體育同你追實體壇每個精彩時刻！
http://bit.ly/2ecTF2A
|
鍾意就快D Share啦！
|
|
|
