掃呢頁CODE去手機

2017年2月16日 星期四

娛刺撈飯:差啲做李小龍第二 鼎爺鑊鏟撩動女人心 __,鼎爺,李小龍,李家鼎,

鼎爺嘅威水史真係唔講唔知!記得早幾年,我Nuts哥睇過一本教人點樣變身型男嘅書,其中嘅第18技係咁講:「烹飪、工作兩得意,撩動女人心弦。」當時Nuts哥對呢個講法不以為然,一來因為作者武田篤典成本書都勁搞笑,二來Nuts哥除咗即食麵同煎蛋外,乜都唔識煮,偏偏嗰期我就同緊個選美有名次嘅佳麗拍拖!正所謂「亂世中出英雄」,撩動女人心弦,使唔使出動鑊鏟呀?直到近日睇到年過七旬嘅李家鼎,憑烹飪節目《阿爺廚房 ...


鼎爺嘅威水史真係唔講唔知!

記得早幾年,我Nuts哥睇過一本教人點樣變身型男嘅書,其中嘅第18技係咁講:「烹飪、工作兩得意,撩動女人心弦。」當時Nuts哥對呢個講法不以為然,一來因為作者武田篤典成本書都勁搞笑,二來Nuts哥除咗即食麵同煎蛋外,乜都唔識煮,偏偏嗰期我就同緊個選美有名次嘅佳麗拍拖!正所謂「亂世中出英雄」,撩動女人心弦,使唔使出動鑊鏟呀?

直到近日睇到年過七旬嘅李家鼎,憑烹飪節目《阿爺廚房》人氣急升,連宅男偶像女子組合Super Girls嘅Cheronna,都被鼎爺抱到笑騎騎,難怪有人話,佢爆紅係個勵志故事!

又係嘅,喺香港地雖然唔會講到出口,但有啲人都覺得「老,就似罪咁㗎」早排先有位小朋友,對住鏡頭嚟個真心話大冒險,佢話:「過期食品畀爸爸食!」連自己骨肉都咁樣,你期望個社會對冇血緣關係嘅上年紀一群「老吾老」?

所以,喺一個大多數人都係老無所依嘅社會,當年細仔李泳豪被楊思琦單方面分手,曾經自嘲過「錯就錯在窮之嘛」嘅鼎爺,竟然可以繼視帝陳豪同樂壇天后之後,成為最新一個被銀行睇中邀拍廣告嘅人選,足證佢真係紅!

奧運金牌都有得攞

就連我Nuts哥啲世侄都話想知多啲鼎爺嘅故事,難得呢個年代仲有後生仔女肯虛心求教,又對上咗年紀嘅老人家咁感興趣,對上一次睇怕都要數到羅拔迪尼路套《見習冇限耆》咯,但嗰套係荷里活夢工場包裝美化出嚟嘅影像,又點及得鼎爺咁有血有肉?

其實鼎爺唔係今日先至孭飛擔正,早喺佢廿歲入行冇耐,已經有幾間電影公司賞識佢,想斟佢做男主角,換着依家啲發明星夢嘅後生,一定𦧲飯應,但鼎爺竟然婉拒晒,情願繼續做龍虎武師,乜解究呀?無非係因為嗰陣做龍虎武師搵得多過做電影主角,加上密食當三番,鼎爺想賺多個錢養屋企囉!

不過有實力嘅人,從來唔會只得一次機會,1973年李家鼎就差啲成功進軍荷里活,嗰時佢已經傾好咗兩部戲,又喺美國買埋屋,仲改埋英文名「Steve」,萬事俱備,點知李小龍突然辭世,外國片商即刻將所有計劃Hold住,要睇睇功夫片熱潮變成咩環境,結果李家鼎進軍荷里活嘅計劃就此胎死腹中。

但係呢個並唔係鼎爺唯一衝擊國際舞台嘅機會,一路做龍虎武師,一路學習騎術嘅佢,竟然騎術精湛到連老外都嗌佢一聲「Crazy Steve」,鼎爺仲曾經諗過參加奧運,但因為皮費重,打消咗呢個念頭,如果唔係玩下手香港第一面奧運金牌,就唔使等到1996年至出現!

鐵漢死穴最怕孱仔

旁人睇或者覺得鼎爺好似被命運搓圓撳扁,但佢就話命運係上天安排!71歲嘅佢,一生星途、際遇可用「一上天一落地一潛水」嚟概括,就算爆紅嘅《阿爺廚房》,當初佢都冇期望過,只希望同公司交代到就算,點知爆出99倍大冷門!

依家嘅鼎爺可以話正處於孔子講嘅「七十而從心所欲」,究竟呢個平日金剛怒目、聲如洪鐘、即使被命運搓圓撳扁都面不改容嘅硬漢,有冇嘢係佢怕嘅呢?答案係有嘅。話說幾廿年前,無綫第八期藝員訓練班出身嘅艾威,曾經喺鼎爺嘅指導下做掌上壓,點知做咗十零下,艾威就咁砰一聲暈咗!捽晒藥油,隔咗分零鐘至醒得番,自始鼎爺見親艾威就擰擰頭,掉頭走,艾威同Nuts哥講起呢單嘢,佢表情裏面有種既自慚形穢,同時又隱約有種自覺巴閉嘅複雜感。

真係爆出咗個99倍大冷門!試問你點估得到,呢個李小龍第二、港版羅拔迪尼路、「狂史提夫」,佢嘅死穴竟然係怕一個孱過自己咁多嘅人先得㗎!


來源 source: http://hk.on.cc
鍾意就快D Share啦!