Fans錫住喝停張敬軒鞠躬跪謝
張敬軒及王菀之（Ivana）前晚在紅館舉行演唱會，期間軒仔重提早前《歌手》事件，粉絲錫住他叫他不要再講，軒仔即以鞠躬、飛吻及單膝下跪答謝歌迷！原來他打算在《歌》節目中唱《櫻花樹下》及偶像陳百強的作品《等》，如今能在騷上唱出，希望令下一代的人都喜歡前輩的歌，一圓自己的心事！
歌手張敬軒及王菀之（Ivana）一連四場《The Magical Teeter Totter演唱會2017》前晚在紅館開鑼，兩人在台上施展渾身解數，一時載歌載舞，一時深情獻唱。期間軒仔唱完陳百強名曲《等》及《櫻花樹下》後，單膝下跪多謝歌迷，表示是特地挑選這兩首歌，並重提《歌手》事件：「大約一個月前大家睇新聞都知，嗰段時間……」此時歌迷即錫住他，大叫他不要再講，並拍手以示支持，軒仔隨即鞠躬、飛吻再單膝下跪多謝歌迷：「當時呢個節目想我唱多啲廣東歌，呢兩首歌我本來想喺節目唱，因為一首係我代表作，另一首係粵語流行曲最輝煌時，我偶像陳百強唱嘅作品，今晚把握機會唱呢兩首歌，算係圓咗一個心事。我會繼續唱多啲好歌，因為只有我嘅歌先可說明一切！」
王菀之驚喜送「肉」背
Ivana亦有送上驚喜，身穿Deep V大露背黑色裙的她為唱《迷失表參道》的軒仔伴舞，雖然她心口有打底及穿上肉色Bra，但仍見到事業線及「肉」背，罕有性感的她即獲觀眾歡呼，她又跟男舞蹈員跳辣身舞。之後Ivana又與席上的老公Eric So傳情，當軒仔唱完《My Way》後，問Ivana為何笑得這樣甜，她即冧笑說：「見到你吖嘛。」軒仔即指住坐在控制台前的Eric So笑言：「你今晚返去瞓廳」當Ivana唱《我真的受傷了》時，對軒仔明言「唱畀第二個聽」，隨即對住老公唱，十分Sweet！到致謝環節時，他們其中一套衣服上的公仔原來由Eric So設計，軒仔說要鳴謝一個人時，Ivana即勁怕醜地邊望地下、邊踢腳說：「Eric So。」最後兩人合唱《手望》為個唱作結，並在台上肉緊攬攬。
突然增加十幾萬粉絲
騷後兩人受訪，軒仔對重提《歌手》一事解釋說：「好想將本身計劃咗嘅歌搬嚟呢度唱畀大家聽，想講係一種傳承，想令下一代嘅人都鍾意陳百強、張國榮呢啲前輩嘅作品。（因為冇得喺節目唱所以依家唱番？）冇咁諗，當時我畀Demo導演聽，話首歌編好咗唔好嘥，呢個版本好好聽。」對於有歌迷叫他不要重提此事，怕會有餘波，軒仔表示聽不到：「第一，件事過咗去；第二，件事咗判斷喺觀眾度，我亦唔覺得有嘢需要補充，不過都有好多支持聲音，想借呢個場合多謝Fans。」
提到有很多內地歌迷因此事特地來撐他，軒仔謂每件事都有兩面：「件事之後我微博突然多咗十幾萬粉絲，Instagram一樣都多咗。（感動大家嘅支持？）好感動呀！成件事我諗我冇歌迷咁心痛，佢哋覺得我捲入呢啲事好心痛，所以我唔會留力演出。」
至於Ivana在台上性感演繹，事前沒有給老公過目，問到回家可會跳番隻舞給老公睇？她笑言不會：「返屋企係咪要休息按摩？（叫老公按摩？）少少啦。」為個唱她減了十幾磅，說到現時腰圍，她笑言：「低過30吋，對我嚟講唔輕易。」另外，據知好友關智斌、衛詩雅及麥子樂昨晚亦有去睇騷。
文：音樂組
攝：鄭家俊
|
鍾意就快D Share啦！
|
|
|