陳宇琛(Sam)同拍拖兩年多嘅有線前主播林佑蔚(Camille)喺今年年初正式入紙申請結婚，婚禮暫時計劃喺年底舉行(新聞連結： http://bit.ly/2laB4Zw )，呢對準新人喺今年情人節去咗學整甜品，過一個sweet到爆嘅情人節！雖然阿Sam同Camille嘅工作好忙，不過阿Sam話有試過為女友下廚，當然唔會係心形牛扒呢啲咁難度高嘅嘢，都係啲家常便飯，所以當日見到佢啲手勢有板有眼，示範步驟俾女友睇完之後，仲喺側邊從旁指導！講到今年情人節啲活動，阿Sam笑笑口話：「講咗又怕穿煲，其實係冇surprise，佢成日投訴我冇特別安排，佢好鍾意surprise，但係我個人好實際，有安排啲surprise，會忍唔住講出嚟！」Camille即刻踢爆話：「佢講到好似好sweet咁，其實冇囉！」阿Sam跟住話：「其實兩個人一齊，唔使特別慶祝，有時少少嘢都可以感受到對方嘅愛，大家做嘢都忙，可以抽少少時間去做啲嘢，唔一定係物質，好似煮餐飯，對我嚟講已經好sweet。」咁拍拖以嚟嘅浪漫事呢？阿Sam話：「浪漫唔係唔想，由識佢到o依家，我已經話我唔係一個鍾意收禮物嘅人，生日都唔使特別慶祝，反而最怕係突然捧住個蛋糕唱生日歌俾我，我寧願一班朋友靜雞雞坐喺度食飯，已經好開心。」雖然講係咁講，不過其實阿Sam都幾識畀驚喜，Camille話：「啱啱過咗嘅生日，真係令我好surprise。」原來以前Camille喺美國生活，屋企養咗6隻貓，返咗嚟香港之後，雖然一直都好想再養貓，但始終因為工作關係，考慮到未有時間照顧，所以一直未有實行計劃，加上同阿Sam拍拖之後，因為男友對貓有敏感，更加唔敢有呢個想法，而阿Sam就主動決定同未婚妻一齊做「貓奴」。阿Sam笑稱愛可以勝過一切，佢話：「我一路會諗，其實係咪可以克服呢？有好多人都話呢啲係心理問題，我做咗一段時間research，嘗試接觸啲貓，可能係為咗某啲嘢想去克服，有嗰種決心，感覺上又OK，結果喺機緣巧合下，遇到一隻心儀嘅貓，所以決定將貓貓加入做家庭成員，幫佢改咗名叫Cinnamon！」Camille話：「我開頭睇都有啲懷疑，以為係plan有咗小朋友先有動物，始終動物係一個生命，有責任照顧終老，不過呢啲係緣份。」阿Sam話：「我爹哋媽咪睇完Cinnamon即刻融化咗，o依家變咗好似湊孫咁，我見到佢哋咁開心，屋企多咗個成員，遲啲又會多個。」點知Camille誤以為未婚夫係講生BB，好自然咁話：「慢慢等，呢啲睇緣份！」搞到阿Sam忍唔住話：「係你呀！你係我屋企嘅新成員，你諗得啲太遠呀，不過……多謝你。」場地提供：Culinart
| 攝影：沈健程 | | |
| | | |
| | | |
| | |
|
鍾意就快D Share啦！
|
|
|