謝安琪開刀誕7磅半B女
現年40歲的女神謝安琪（Kay）昨日開刀誕下7磅半重的囡囡張靖（Karina） ，張繼聰坦言見到老婆生BB感肉赤，又指太太沒有如傳聞中結紮，笑言除非男人可代產才考慮再生。阿聰又指囡囡的英文名是她「報夢」而來，認真奇妙。
恭喜！恭喜！藝人張繼聰與歌手老婆謝安琪再為人父母，已有一子張瞻的兩人昨日再添女兒，Kay到沙田仁安醫院剖腹誕下7磅半女兒張靖（Karina）。再為人父的阿聰昨午在醫院外受訪，甫現身已一臉笑容，更拿着BB小禮物給傳媒，分享喜悅，他說：「多謝大家祝福，我好似經歷咗一個新階段，囡囡出咗世，七磅半，係開刀嘅。成個過程我都有經驗，上次係順產，記得上次自己緊張到好似醉酒咁，係咁重複講唔該、多謝，搞到好失禮咁！今次就搵個位唔關事咁坐開啲，但都差啲撞到儀器。成個過程好感動，太太同囡囡好叻，好快就聽到佢喊聲。」他笑言上次幫囝囝剪臍帶，個心都離一離，原來臍帶好粗，他說：「阿公（蘇永康）好叻，一下就剪到，我剪咗三下！覺得好感動，想Keep住硬漢啲，生嘅過程醫生都對我寄予厚望，叫我講吓笑，令太太唔好緊張，從來未試過『乾塘』，嗰刻唔知講乜，就好似小學運動會咁講加油呀！」
男人「代產」先再生
阿聰又表示看着太太生B手術過程，大感肉赤，笑言兩個夠晒數：「除非科學發展到男人可以代生！」又指Kay已開始餵母乳，囡囡見到他，就捉住他的手指哄埋塊面度。他續說：「唔可以錫晒個女唔理老婆，老婆好攰，佢話比想像中攰，我話生咗個BB喎，係正常！呢刻我都好亂，早半個鐘我都可能講到喊。」又指護士長有幫他們與BB合照。
說到改名，阿聰自爆是囡囡「報夢」得來：「我由細到大都鍾意呢個（靖）字，太太都係，好恬靜咁，英文名一開始諗另一個，但有一晚發夢見到一個好可愛嘅妹妹，話想叫Karina，同媽媽個名都由Ka開始，我同太太講應該係個女報夢要自己揀。」
期待子女見面一刻
問到兒子見到妹妹未？阿聰說：「未，佢都問可唔可以唔返學，我話佢放學先出世。一陣會由家人帶佢嚟，都期待兩個小朋友見面會點。」他續透露Kay過幾天出院，自己今日亦要為劇集《誇世代》開工，但會抽空陪太太，笑言開工就開工，去醫院探妻女就如返酒店般。對於有指Kay「紮埋」？他說：「冇呢個打算，但兩個夠晒數！（幾時復工？）頭先睇見佢對住個女嘅甜樣，一、兩年走唔甩，自己都係樂迷，大家都掛住佢，但呢一刻冇諗工作。」
文：影視組
|
鍾意就快D Share啦！
|
|
|
