現年55歲嘅劉德華向來係工作狂，但今年1月，華仔喺泰國拍廣告時不慎墮馬受傷，要坐醫療專機返港就醫，幸好日前終於可以出院。（新聞連結： http://bit.ly/2mWWmbo ）華仔透露過今次傷勢唔輕，盆骨多處骨折，並有筋腱肌肉拉傷。據悉華仔太太朱麗倩喺華仔住院期間，要每日由秘道出入醫院照顧華仔，如今華仔可以出院返屋企休養，屋企人當然最開心。早前讀者李小姐透過《蘋果》爆相爆片，話喺深水涉北河街見到劉太朱麗倩同4歲大囡囡劉向蕙。當日下午兩點幾，素顏嘅朱麗倩貫徹低調作風，打扮得好樸素，穿上一條鬆身直間連身裙、平底鞋及揹tote bag，同一般家庭主婦差唔多，平時朱麗倩出入都會戴口罩，但去到平民街市亦唔介意以真面目示人。早前有傳朱麗倩喺去年8月在外地秘密為華仔生B，當日所見，朱麗倩身材有少許發福，但未見有疑似BB仔出現。而華仔一向好保護家人，老婆同囡囡出街都會安排保鑣及家傭陪伴在旁，李小姐話﹕「見佢(朱麗倩)一路抱住個女，去完豆腐舖，再去隔離個菜檔，係畀錢先放低個女一陣，跟住又抱番起佢。(有冇人認得佢？)又唔覺(賣菜)阿姐有特別稱呼佢，但見保鑣個樣都幾惡，會成日周圍望，而兩個工人姐姐就一直企喺隔離，買完幫手攞嘢。」而4歲大嘅向蕙紮住條辮仔，眼仔碌碌、五官精緻，生得非常得意可愛，全程緊緊攬實媽咪冇扭過計，買完餸準備離開時，向蕙一雙小手緊扣，成個頭挨落媽咪膊頭，表現非常之嗲，真係冧死人！之後四大一小，一行五人就上番停泊係附近嘅七人車離開。
| 朱麗倩帶囡囡向蕙去街市買餸，全程好乖冇扭計。(讀者提供) | | |
| | | |
| | | |
| | |
|
鍾意就快D Share啦！
|
|
|
