擁有九架私人飛機的大劉，於○七年曾一連兩天參觀商用航空展，當日下機時看到記者，雙目炯炯有神。
絕代梟雄
1億買起毛澤東 大劉 96蚊剪個髮
手袋及鑽石，是大劉買給女人的玩具。而這位超級富豪自己的玩具，則是私人飛機和遊艇。他曾以六億元，買入一架世界級巨型遊艇，還以母親劉葉淑婉名義，把它命名「 Lady Lau」。這艘共有五層的海上行宮，面積達萬呎，中間設電梯方便上落，無比奢華。但富貴的他同時亦有「貼地」的一面：在上海髮型屋以一百蚊有找的價錢，洗剪吹連同剃面。消費得精刮，或許正如他最近向傳媒憶述自己生平時說的：香港大部分人，都低估了我的智慧。
過千億身家的大劉，擁有的「大玩具」，也是香港大部分人也不能負擔。一○年時，他以六億元造價，買入一架世界級巨型遊艇「 Lady Lau」，同年六月在意大利 Viareggio舉行下水禮。這艘海上行宮除有豪華主人房外，另有各具主題的九間客房，最多可邀請十八位賓客上船過夜，比豪宅還要巴閉。遊艇內設按摩池、電影院、健身室及酒吧，玩樂設施一應俱全，完全解決到「土地問題」。
浴室用料精緻昂貴，全以大理石打造。更誇張是，船內設置車房，賓客可以駕車出碼頭。一四年四月，林建岳女兒林恬兒下嫁何柱國兒子何正德，「 Lady Lau」亦同時由意大利因佩里亞，開往法國南部城市昂蒂布，停留在婚禮酒店附近的 Cap d'Antibes，直至五月才回航，可惜同年大劉因澳門官司纏身，等錢使的他連「阿媽」都要劈價一半至四億五千萬放售，可惜無人接貨，到一五年八月這艘遊艇才成功賣出。
飛機噴成企鵝
講到富豪玩意，大劉○七年曾分享消費心得：「買佢（私人飛機）就好似後生仔買新車一樣，追求最高性能嘅 dream car，所以我都買咗架（ 707飛機），初步留作自用。」對一般富豪而言，一兩架飛機絕對只是等閒事，而大劉起碼有九架私人飛機。其中的波音 787夢幻飛機（ Dreamliner），他更是斥資十二億元訂購。此機不但華麗，機艙內的壓力水平，更會調校到約六千米，遠低於現在一般飛機的八千米，有效紓緩因機艙壓力而引致的頭痛和不適。除了買機心態「年輕化」，大劉冧女手段也絕對拍得住後生仔。甘比鍾情動畫企鵝家族 Pingu，大劉就花心思，特別將其中一架飛機噴上企鵝圖像，以博取紅顏一笑。
「靚嘢始終有人搶嘅，呢個世界，無論經濟點好點差，有財力嘅人都會追求靚嘅嘢。」最識計數的大劉，多年來買入不少藝術品，提升品味之餘更可以升值，當中的明朝嘉靖五彩魚藻紋蓋罐，他以二千二百萬元買入，轉手以四千四百萬元賣出。其早年收藏以古董為主，更考慮過興建私人博物館，但未有成事。以前他亦會親自同甘比出席拍賣會，但近年轉透過電話下單，口味也改投向當代藝術。○六年他用破紀錄價一億三千五百萬元，買入 Andy Warhol名作《毛澤東》肖像，震撼拍賣場，及後再用三億買入高更名畫《早晨》，令他成功進身全球十大藝術品收藏家之列。
平民價剪髮
大劉平時出手動輒過億，但每件事都「有個價」，他的招牌髮型，只是一百元有找。○二年他曾提及：「我細細個住喺跑馬地，自細已幫襯上海式飛髮鋪，咁多年都係咁剪，感覺又幾好。」獲他御准剃頭的，是銅鑼灣一間上海髮型屋，洗剪吹連同剃面，當年僅需九十六元。後期轉戰舊文華酒店二樓，同樣由上海老師傅主理，剃鬚也只是五百元。
雖然大劉經常出入福臨門，但早年他跟一般人一樣，都愛吃雞翼及叉燒，打邊爐必選美國肥牛。他要求家廚煮食不能下味精，有潔癖的他並需經常換碟，身邊保鑣常以紙巾毛巾傍身。一日三餐盡是珍饈百味的大劉同樣注重健康，壯年時最愛打拳出汗，每次做掌上壓都要做足一百下。當然，無論是生活或精神上有多富足，也不及有個伴在身邊，到底大劉最終為何會選擇記者出身的甘比做第二任劉太？想知詳情請留意下一期《絕代梟雄》。
撰文：財經組
ed_bn@nextdigital.com.hk
|
鍾意就快D Share啦！
|
|
|
