粗身大細的 Miki，沿途同老公一直拖到實。
娛樂偵訊
奶奶錫到燶 Miki養和頂級套房生 B
上年十一月宣布造人成功的楊愛瑾，早前就同老公郭永淳一齊影大肚寫真，佗住九個月 B，完全無孕婦水腫，得天獨厚。
BB將於今個月出世， Miki已經做足準備，日前就同老公去揀定 BB車，而身任養和董事局成員的奶奶，更 book定頂級套房，俾新抱仔生 B！
自然分娩
三十二歲的楊愛瑾，同永安太子爺郭永淳拍拖八年，終於排除萬難在上年四月拉埋天窗，有情人終成眷屬！ Miki更火速造人成功，預產期在今個月。
「始終老公屋企有頭有面，唔係咁想 Miki拋頭露面，結婚前 Miki已經決定減產，只係間中出席吓活動，大肚之後，老公好緊張，更加唔想佢操勞！」 Miki友人說。
話晒第一胎， Miki好想留住大肚婆最美一刻，早前就同老公影大肚寫真，由於計劃自然分娩， Miki佗 B之後，仲 keep住做運動。
「 Miki本身係好鍾意運動，佗 B之後都無偷懶，佢仲拉埋老公一齊 keep，阿淳更加 keep到六嚿腹肌！」
一齊 keep
BB下月出世，兩公婆已不停為 BB添置用品，日前，兩人就專登去中環萬宜大廈揀 BB車。
雖然已經佗 B九個月，但 Miki個肚唔算太大，而且手腳面頰都無水腫，同老公喺皇后大道行去萬宜大廈，步伐依然好輕盈，原本一支箭入咗間孕婦 BB用品店，但無耐兩人又行番出嚟，原來大肚婆人有三急， Miki去洗手間，老公就企埋一邊等佢。
兩人之後入番 BB用品店，似乎早有心水揀 BB車，見 sales姐姐細心講解，郭永淳又推住 BB車研究，揀咗廿分鐘，終於買到心頭愛。
自從升呢做少奶奶， Miki出入都有司機接載，當日買完嘢，另有工作的郭永淳先送老婆上車，細心的他更開埋車門俾老婆。
家族顯赫
郭永淳出身上流社會，父親郭志權是永安百貨創辦人郭泉之孫，至於外祖父李樹培，加入養和醫院 80年，領導醫院近半個世紀，是養和醫院董事局前主席，律師出身的母親李宛群，也是養和董事局成員，舅父李維達則是養和院長，連 Joyce Boutique的創辦人馬郭志清（ Joyce Ma），也是家族成員之一。
撰文、攝影、攝錄：娛樂組
|
鍾意就快D Share啦！
|
|
|
