現年82歲嘅譚炳文(炳哥)早前被《蘋果》率先爆心臟有問題致氣喘入院，休息一輪後最近已復工。日前炳哥接受商台梁泰來主持嘅《1圈圈 星光背後》訪問，炳哥透露已無大礙。炳哥多年來與85歲嘅李香琴(琴姐)都被喻為「最佳拍檔」，對於李香琴年前中風，炳哥話去年探過琴姐，佢話﹕「琴姐唔係好認得人喇，見到佢時會『吖，係呀係呀！』其實都唔知佢係咪認得我，睇住佢原本係一個精靈嘅人，依家要係世界上受難，唉！人生真難估計！」前年譚炳女兒譚淑瑩亦有份探望琴姐，並在網上貼上合照，見琴姐一頭白髮，但精神卻非常好，仲好貪靚搽唇膏。炳哥話最欣賞琴姐待人好，同佢最合拍最有默契，但同琴姐傳緋聞傳足幾十年，炳哥話：「我不會理人點講，由人點講，當佢哋傻！(炳嫂有冇呷醋？)呷又好，唔呷又好，理得佢吖，都幾十年。我依家唔會有咩目標，嘆多幾年，就活多幾年！」與炳哥同期出道嘅朋友，甚至有啲後輩相繼開呢個世界，炳哥好概嘆：「佢哋嘅離開我當然覺得傷感，呂啟文、何雪影等，而林保全(叮噹配音員)都係我帶出身，以前跟我配電影，可惜都離開咗。」炳哥希望人生可以充實啲，自言永不言休﹕「喺屋企對住四面牆做乜？返去配音過日辰，又可以同年青人傾偈，行路搭車，又也可當做運動，係屋企好悶㗎。」炳哥話咁多年嚟最後悔接咗尤伯連納的反吸煙宣傳片，搞到自己賺少好多。炳哥承認自己好大使，佢話﹕「我喜歡食最好嘅東西，飲最靚的酒，所以我唔算有錢，但肯花錢，我經常講：『有錢肯花錢就係財產，你死孤寒，一毫子都不肯花，錢只變成遺產』。」
|
鍾意就快D Share啦！
|
|
|
