曾經喺媒體「老是常出現」嘅吳若希，因為未婚懷孕呢件「幸福的事發生了」，要自動摺埋移居澳門安胎，隨時生得。喺呢段暫別娛圈嘅日子，想見佢惟有靠社交網。好多人都諗唔明，佢點解要「自毀前途」有女神唔做，去做C9？吳若希嘅人根本就係一場又一場賭博，24 歲經歷多番高低，刺激過玩21點，閱歷之廣堪稱「傳奇」，今次「晒冷」又如何？
人生如戲？千金住公屋
吳若希喺福建出生，阿爸曾經喺故鄉經營酒店生意，一家人食飽無憂米，惜好景不常，喺佢7歲嗰年家道中落，爸爸生意失敗，心情差就去喪賭，所謂屋漏兼逢雨夜，最終舉家離鄉別井嚟香港搵生機。就因阿爸一子錯滿盤皆落索，做慣千金小姐嘅吳若希都要硬做草根妹，由鄉下住開2,000呎大宅，一下子要屈居400呎公屋，為咗慳少少錢，每日徒步成半粒鐘返屋企食飯，想食平民快餐就要儲足一星期錢，由天堂跌落人間捱世界，只得嗰10歲人仔嘅佢已深明「錢唔係萬能，但冇錢就萬萬不能」嘅道理，立誓要粉身碎骨咁搵錢，令屋企人有安樂日子過。
吳若希16歲時，同朋友去唱K就畀經理人發掘咗，人生出現曙光，接受4年演藝特訓正式做歌手，當然冇後台又冇錢，初嚟埗到梗係充當企埋側邊小角色，捱到算有人知佢係乜水時，又發現腹部生血瘤要停工半年，問公司借10萬蚊做手術，連男友阿媽都嫌棄佢做娛圈，強行棒打鴛鴦，喺事業、愛情雙失下，如賭本一鋪清袋咁灰，情緒低落到患抑鬱症，佢自爆曾一時睇唔開啪咗成樽安眠藥，諗住一死百了。
大難不死的吳若希否極泰來，又好似賭啤咁，連開十鋪冤家牌時，梗等到一鋪翻身機會，佢簽咗做無綫親生女後，加上同唱片公司愛將鍾嘉欣傳掛住拍拖而遭雪藏，喺天時地利人和下造就佢上位良機，畀佢執到唱電視劇《使徒行者》主題曲《越難越愛》，就一曲成名狂掃獎，仲首奪無綫勁歌頒獎禮「金曲金獎」，佢攞獎時喊晒口話：「一切嚟得太快。」人氣贏到盡。翌年佢乘勝追擊嚟次Show Hand， 加簽無綫5年合約博冧莊，結果又係憑劇集歌《眼淚的秘密》再攞「金曲金獎」。有名自然有利，同年佢突然富貴，有本事4萬蚊月租何文田豪宅，80 萬Range Rover、近百萬波子在手，財力變得深不可測，更有意買3,000萬豪宅畀阿媽、細佬住。
天煞孤星？至親輪住走
兩首歌令吳若希名利雙收，不過同時亦輸咗和氣，可能佢「太打耳」，連佢都唔知「點解嘅」成為網民圍插目標，網上不時傳出負面傳聞，好似同前度嘅陳年啜嘴相、兼職模特兒時嘅平胸三點式照，又被傳曾喺夜店工作，緋聞男友一大籮等，連拍劇着件護士衫坐喺病床都被鬧唔尊重醫護人士，令佢最傷心係佢媽咪喺大埔踩單車撼穿頭重傷，好在最終康復，點知又到外婆、外公兩個月內相繼離世，至親生離死別先最慘。
經歷生死令吳若希睇透真愛才是永恒，突然首次公開戀情同澳門闊少Alex 高調晒愛，拍拖半年忽然分手，點知隔幾日又話復合仲宣布未婚有咗，預產期係4月。早排沉醉於幸福中嘅佢，孖男友影半裸大肚相， 見佢個樣真係好冧。Nuts哥唔評論吳若希呢次過大海，用7年事業博終生幸福係咪賭大咗，但有樣、有錢又有名氣，24歲嘅佢大把本錢繼續玩落去。
|
鍾意就快D Share啦！
|
|
|
