娛樂偵訊
男神頂唔住 黃子華倒吊面青青
拍電視劇、做棟篤笑黃子華無得輸，但一踩入電影圈，就頓變票房毒藥，萬試萬靈。為了自編自演的新戲《棟篤特工》票房好好睇睇，男神唔單只碌爆人情咭搵圈中人客串，自己亦交足功課，早前於西環碼頭拍倒吊場口，劇組原定替身頂上，再補拍大頭交代，但子華嫌效果麻麻，堅持親自上陣，拍足六個鐘，拍到面青青先有得收工，辛苦晒！
才多身子弱
黃子華自編自演的新片《棟篤特工》找來七年前合作過《絕代商驕》的佘詩曼做女主角。早前兩人孖咇於西環碼頭開工，當日氣溫廿多度，但兩位主角以及幕後，絕大部分都羽絨上陣，全因海邊的風勢凌厲，差點連當日要拍的子華倒吊場口都要取消。據知，劇組原本為男主角預備了替身，但黃子華甫到現場便追問導演成個倒吊的流程，然後便拋下一句：「我 OK喎，自己拍番」
倒吊時間長容易腦充血，分分鐘搞出人命，所以每拍一陣子，工作人員便要將黃子華放回地面，回一回氣。開工個多小時，男主角忽然叫停，並除下身上的威吔，原來是「才」多身子弱，黃子華向幕後借來保暖膠布打底，加上熱茶傍身先至繼續拍。
同場有份開工的阿佘，當日行行企企，不是八卦子華倒吊實況，圍讀對劇本，便是拉着幕後人員吹水，加上自備七人車，企到攰又可以上七人車慢慢等，比起男主角轉景休息時坐劇組車舒適得多。
Chilam電眼失效
黃子華拍電影多年，一直搣唔甩票房毒藥的污名，○二年編、導、演集一身拍《一蚊雞保鑣》，只得十一萬票房，慘淡得嚇人，雖然男神口口聲聲話自己沒有票房，「我一啲壓力都無！」但為了《棟》片票房有交代，有份編劇的黃子華改到第十稿先肯開鏡外，亦搵盡圈中人客串，除了相識一場的吳君如、鄭秀文，連鮮有往來的譚校長（譚詠麟）同張智霖亦俾面。
其中有份做串星的 Chilam於大坑東遊樂場開工，當日他一身牛仔打扮爬上滑梯，準備變身扮超人，平日一雙電眼已經迷死人的 Chilam，當日對住小朋友，單靠電眼係唔夠，他需要又氹又玩，扭盡六壬先至同小演員混熟，雖然工夫多一點，但起碼兩個有偈傾， NG都少一點，不夠三小時便已經拍完收工！
撰文、攝影、攝錄：娛樂組
|
鍾意就快D Share啦！
|
|
|
