探熱針
大台阿媽系列 66歲有米程可為仍單身：我唔需要伴
現年 66歲的程可為，七二年第一期無綫藝員訓練班畢業，出道即被安排做女一，跟當家花旦趙雅芝以及高妙思等拍青春劇《乘風破浪》，又跟仍未嫁入富豪的最美麗港姐朱玲玲合作女性劇集《瑪麗關 77》。
朱玲玲趙雅芝同排
八三年移民加拿大，十四年後回流香港的她，卻變為女主角身邊的大媽惡家婆，她從沒有執着以前的風光年代，她說：「我冇唔捨得，人就係咁，就算俾你做重角色又點啫，年紀開始大，又負荷得咁辛苦。」她在古裝劇《紫禁驚雷》飾演老太后，更印證自己想法：「幾大壓力，慌死做得唔好，食嘢都唔開胃，我覺得唔使咁辛苦，有同事做得好，咪俾人發揮。」
每六個月打一次 botox
自認不是高材生，卻是個乖學生，十多年前，什麼角色也會接拍的她，由早踩到夜，一日走三個廠。直至甲狀腺出現問題，做完手術，還要每六個月打 botox，將眼皮放鬆：「醫生話要打針將眼皮 release啲出嚟，遮住凸出嘅眼珠，因為甲亢病令眼珠肌肉脹大，冇辦法即刻收縮返。我拍《心花放》時，有啲 close up鏡頭會見到。」甲亢要長期服藥控制，她自此更小心身體。
瞓住接受訪問
去年七月，她不小心跌傷腰骨，要停工瞓床休息，本來在電視劇《心理追兇》有「半裸」性感鏡頭，也臨時交由大她三年的馬海倫去演，成為一時話題。
「我好得七七八八，初時上身同下身好似黐唔埋咁。今次跌親，行動唔係咁醒目，而家都係瞓喺度同你做訪問。喺加拿大試過跌親，都係游水好番，希望夏天快啲到可以游水，等啲筋骨鬆番，唔係返工捱唔到。」程可為說。
演員是第一份工，當時聽從媽媽意見「唔好做啲咁辛苦嘅工」，因無綫尚位於廣播道，離她們家不遠，她更不想畢業後坐在家游手好閒，於是選擇做演員。撇除移民加拿大的十四年，一生人就只有這份工。
開工食福臨門外賣
從來不為錢打工的她，在大台開工食飯，甚至會叫富豪飯堂福臨門外賣，她解釋：「我只係喜歡食嘢，好似通告係下晝三點，我會先揀一啲自己鍾意食嘅地方，食完之後再打包多一份。好似我整花膠炆排骨，有時煮得大份啲，咪跟同事一齊分享。」
有指曾經有兩次結婚機會，都給她拒絕了，多年來抱獨身主義，她說：「梗係有人曾經令我心動，不過我後生搵到食，覺得冇必要搵個伴咁煩，而家好安樂，好享受。好多人恨結婚，覺得一個人 lonely，我唔需要有伴，唔好咁多煩惱，就係福氣嘞。」
勸出家莊文清三思
跟程可為同期出道的還有早年削髮為尼的莊文清，提起這位朋友，程可為表示曾在對方出家時勸她三思：「佢依家都唔要見我，呢個傻妹，以前我同佢好到不得了，我後生學人炒樓，都已經叫佢買一間，我話可以養過世，唔會教錯佢。佢當時買咗，到後期佢做尼姑，咪俾佢媽咪住。佢出家前，我同佢講唔使出家，離婚唔係咁大件事，我當時移民溫哥華，係投資移民，我去到嗰邊，可以申請埋佢過去。」
莊文清沒有聽她的意見， 91年出家法號衍藏，前夫是監製招振強。
撰文：娛樂組
攝影、攝錄：蘇銘賢
|
鍾意就快D Share啦！
|
|
|
