性格硬朗倔強的湯記，對住個仔就軟化晒。「男人不忠咪走囉！但個仔幾曳都係由我個肚出嚟。」
探熱針
與男友分房瞓八年 不婚湯寶如：個仔維繫住我哋
離開樂壇十一年的湯寶如，近日主持大台節目《流行經典 50強》兼推出新歌，再活躍幕前，已為人母，焦點自然落在她一直低調的家庭生活。
45歲的她，與一起十四年的賽車手兼商人男友陳德民育有十歲兒子，仍堅持不婚，還與伴侶分房瞓八年之久。湯記坦言她的底線，比一般女人都 set得低。別人可能冇法接受的相處之道，反成他們幸福途徑。
兒子陳俊滔的出現，挽救曾經瀕臨分手的父母，湯寶如說：「個仔維繫住我哋。」
生活方式各異
多年來與另一半分房瞓，連朋友都以為他們情變，湯記說：「佢哋話介紹男友俾我，根本我同另一半關係冇問題。」
分房瞓，是他們找到一個合意的獨特相處之道。「分房原因係我哋生活方式太唔同，佢兩父子生活好規律，十點熄燈瞓，朝早五點起身湊仔返學，我就係夜鬼，朋友夜晚十二點會打俾我，費事嘈醒佢，咪寧願分房瞓，咁一起身又見到大家，幾得意呀，然後佢問你今日做咩？返唔返嚟食飯，咁多年都係咁。個仔由一歲到九歲都同佢瞓，獨霸爸爸。」湯記說。
「奶奶」仲係叫伯母
難道需要空間，就不需要名分？「我唔鍾意結婚，好怕約嘅束縛，試過參加婚禮，聽到啲誓詞覺得好恐怖。」認為名分是沉重包袱，至今她仍稱呼伴侶做男友，他的媽媽，即阿仔的嫲嫲仍堅持叫伯母。她續說：「係呀，老人家起初都抗拒，後來都接受，仲成日話個仔做乜仲唔娶我，我話：『伯母，唔使嘞！』，哈哈！我同男友好自由，我哋好少打電話俾對方，我完全唔過問佢去邊。」
真係可以放心到咁？「我冇諗過佢有咩女人，變唔變心！信任好緊要，要變我都阻止唔到。」她說。
至今未遇到最愛
作為女人，可以達至這境界，原來如此。「你可以話我條底線 set得好低，確係好低，只要佢唔係帶個女人返屋企，影響到我個仔就得嘞。冇嘢緊要過我個仔嘅感受。」
底線低，倒不如說她對男女關係看得輕。「都係㗎，朋友夫妻也好，緣分嚟啫！至今我未遇到最愛，亦唔覺遺憾。喺我哋最危險時間，就有呢個 BB出現，因為佢（兒子）令我哋維繫十幾年感情。」
情人節攤牌
當日照超聲波，一幅胎兒的畫面，令貪玩的湯寶如甘願定下來，決定將今後的時間獻給他。哪管作好最壞打算，要做單親媽媽。
十一年前，湯記選擇在情人節，跟分手邊緣的陳德民攤牌，並將懷孕的消息告之對方，以他的態度決定去留。「同佢講，情人節有份大禮物，我有咗！佢當堂擘大個口得個窿，然後一句：『我唔結婚㗎！』我話：『我都唔會結婚，至於 BB，你唔要我都會要。』，點知佢話：『要，點會唔要！』我覺得個天注定我同佢一齊。」
男友是超班爸爸
兒子陳俊滔，挽救他們的感情，更把性格自我的賽車手爸爸脫胎換骨。「湊佢返學、放學、煮飯、睇功課、親子運動，咁多年都係佢負責，佢對住個仔好似情人咁。」在湯記眼中，陳德民未必是滿分男友，但肯定是超班的好爸爸。
「佢唔單只做番男人對頭家嘅照顧（包括經濟），仲俾我繼續做自己鍾意嘅事，佢好好。」她與男友關係似 partner，合力做好父母角色，努力維繫這個家。
撰文、攝影、攝錄：娛樂組
|
鍾意就快D Share啦！
|
|
|