拍檔 Mandy
娛樂偵訊
現場直擊 牛津劍橋朋友蒲頭 林作中環搞 speed dating唔搶食
現年 27歲林作，跟女友麥明詩分開後不斷有搞作，放棄唔做大律師，客串拍戲做埋補習天王搵真銀，原來兩個月前，他已經搵定拍檔搞 speed dating，落手落腳開始第一檔生意，上週五在中環一間餐廳試業，一班牛津劍橋朋友撐場蒲頭，全程幫手指導大家玩遊戲的他，更事先聲明絕對唔會同參加者搶食。
好快打成一片
林作夥拍公關朋友 Mandy開檔搞 speed dating，雖然兩人異口同聲表示，他們的活動性質介乎 speed dating和 networking之間，不過就信心十足有好反應。
「我覺得呢檔生意有得做，好多香港人好似我咁，即係二十到三十歲之間嘅人，因為工作關係，好少機會同時間識朋友，總之有困難，有啲工作咗好多年，發覺生活圈子愈來愈窄，夜晚出去社交都係同一班人，但其實一班人同另一班人之間嘅距離唔係咁遠，好容易就打成一片，就好似今晚咁，提供地方俾佢哋，逼佢哋坐埋一齊，就會發覺六個人一 group，好快變成十二個，再變為廿四個。」林作說。
港姐港男都玩
女士收三百，男士收六百，林作堅持以後每星期舉辦的 speed dating定在二十多人的 scale，因他不相信過百人活動能真正達到互動效果。
「我會搵自己朋友嚟玩，如果佢哋有需要，每星期都會有意想不到嘅嘉賓，而家保持神秘，可能係大家認得嘅面孔，港姐港男都有機會，甚至乎係公眾人物，不過我哋私隱度好高，係高度機密，今次試業就俾大家影吓。」林作說。
有大律師資格，揸靚車住豪宅，牛津畢業的林作都算筍盤，不過做搞手的他自言公私分明，不會同參加者搶食：「我對呢件事好認真，唔會公器私用，唔會喺度識女仔。」
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|