八卦陣
被《壹》仔報導刺激神經 翁靜晶幫毛孩維權
新嘅動物繁殖條例上個月實施，《壹》仔上期亦作出專題報導，仲提及一啲猶如人間煉獄嘅非法繁殖場，結果引來唔少毛孩主人關注，當中包括養咗十幾隻貓嘅翁靜晶，佢仲响 Facebook分享有關新聞。
原來翁靜晶嘅愛貓 Snowflake啱啱過身，身為佛門中人嘅佢，喺心愛毛孩最後十幾個鐘一直陪住牠，寸步不離，仲為佢誦經。愛貓最後往生，佢就話希望同 Snowflake來生再見。
因為愛貓嘅離開，《壹》仔嘅報導亦刺激咗翁靜晶嘅神經，眼見文明香港竟然存在動物地獄，令到佢決定採取行動，問好朋友們：「我們可以做些什麼，去協助小動物離開煉獄？」佢為咗幫啲毛孩，就提議組織一個法律團隊，監督相關部門有冇正視有關繁殖場嘅投訴、跟進調查同執法嘅效率，仲話自己可以提供辦事處同電話，亦可以聯絡三至五個志願律師。
呢個 post一出，短短兩日就有二千幾個讚好、近五百人分享，唔少網民都話支持佢，仲有唔少人留言話願意做義工添。
陳國基未入熱廚房 先被拆祠堂
「特區奶媽」眾裡尋他千百度，最終搵咗前入境處處長陳國基做候任特首辦主任，仲講到明七一之後佢會順利過渡去新班子。外號 KK嘅陳國基，明明已經退咗休，點知撈底再搵多筆，佢如果能夠做足五年，單係人工已經淨袋二千萬。
好多人大讚陳國基為人八面玲瓏，原來佢真係正宗「順德人」，而且仲係順德聯誼總會董事。呢個會係廣東省順德區喺香港嘅同鄉組織，反佔中、反拉布遊行呢啲撐政府行動，都見慣佢哋幫手動員，已故新世界主席鄭裕彤同恒地主席李兆基都係董事之一，反而同樣係順德人嘅保安局局長黎棟國就冇入局。
之不過，陳國基同順德嘅淵源應該唔太深，事關佢上任做入境處處長時，順德鄉下想沾光，點知搞出籍貫爭議，錯指佢係順德樂從人，但陳國基鄉下嘅堂細佬主動搵《南都》澄清，話阿哥其實係容桂人而非樂從人，仲話當地有條陳地大街，曾經有座有九十九扇門聞名嘅陳氏大宗祠， KK父輩就喺嗰度長大，三四十年代為咗逃避戰亂，先輾轉去咗香港，至於當年個祠堂，就早已經俾人拆咗變廠房。
75樓做崇拜 郭炳江返全世界最高教會
新地前聯席主席郭炳江同前政務司長許仕仁嘅世紀貪案終極上訴。之前郭炳江保釋等候上訴，一早表明唔會返公司處理工作，反而希望花多啲時間鑽研神學。
郭炳江係一名虔誠基督徒，佢耐唔耐都會去中環廣場嘅 Sky City Church聽道，呢間教堂位處七十五樓頂層，飽覽維港美景，上到去感覺置身空中，難怪被譽為「全世界最高教會」。有教友笑言，上到咁高嘅場地，好似比其他教會更接近天堂，敬拜時特別有感覺。
查實郭炳江信主係有段古，話說當年郭氏三兄弟秉承父親遺願，擴展公司事業，九四年事業進入高峰，可謂有錢、有面、有地位。但當時佢突然覺得好空虛，有地位雖然令佢覺得有自信，但個人同時又好空虛自卑，一日比一日擔心，恐懼感揮之不去。
最後太太俾咗本福音小冊子佢，佢睇完覺得好舒服，第二日就同太太去教堂，開始信主之路。之前喺赤柱監獄服刑大約一年半，郭炳江都修讀神學，保釋時一星期上三日神學堂，所以面對單案，佢引用《聖經》話：「要將一切憂慮卸給神。」
黑面零笑容 林鄭唔妥北京操控
林鄭高調「欽點」 KK，當日孖住佢開記招，大讚對方符合晒自己嘅條件，係「出任呢個位置嘅最適當人選」，但口裡說得，身體卻很誠實。
話說當日林鄭介紹咗幾句 KK，就將個時間交俾佢，然後企喺佢身邊，但當 KK用英文講番林太點樣邀請自己，佢又點欣賞林太，所以諗都唔諗就應承入熱廚房時，林鄭一直木口木面冇表情，唔只零笑容，係連眼神交流都欠奉。
究竟陳國基係咪林鄭首選？有傳佢其實係北京安插嘅人馬。有傳媒話，林鄭組班，除咗面對食檸檬之苦，仲要面對阿爺指點之痛。一向要叻嘅林鄭，竟然同北京講，話希望唔好對佢指指點點，結果係點？當然係換來北京訓斥。
《壹》仔仲聽聞，財爺個位已經過咗六輪篩選，進入二揀一階段，但兩個人選，一個係北京屬意但林鄭抗拒；另一個就係林鄭心儀但北京唔多鍾意。照咁發展落去，林鄭呢啲「定格」樣，應該陸續有來。
撰文：巫不言
news@nextdigital.com.hk
|
鍾意就快D Share啦！
|
|
|