7年官司諗過坐監
志雲王喜兩心知 25年不變
【《蘋果》專訪】曾呼風喚雨的無綫前總經理陳志雲，2010年因涉貪案而一鋪打沉，昔日愛將一一劃清界線，就只有相交25年的王喜不離不棄。月前志雲終極勝訴，纏擾7年官司終告一段落，兩位知心友昨日接受本報專訪，志雲坦言當日有諗過要坐監：「我做人鍾意做到最壞打算。」笑問二人會否由友情變成愛情時，志雲哈哈大笑說：「咁你話有冇變到呢。」
陳志雲（右）涉貪案月前獲終極勝訴，他最感謝身邊天使王喜一直無限量支持。攝影：沈健程
陳志雲7年前捲入涉貪案以來，王喜一直為志雲擋風擋雨，3月志雲獲得終極勝訴時，大讚王喜是天使。這對相交25年的好朋友，將於下月22日至27日在新光戲院首度合作演出舞台劇《雷雨對日出》，昨日二人一起接受本報專訪，原來志雲跟王喜特別有緣，王喜（原名鄺毅怡）父親名字同樣叫志雲，而王喜7月27日生日，正正是志雲母親二十多年前離世的同一日。
志雲（右二）因09年出席奧海城倒數活動而捲入涉貪風波。資料圖片
志雲（左）力撐王喜工作上絕不是麻煩友。
探監爭頭三位
問志雲可曾想過官司敗訴要坐監？志雲坦言：「有，我做人鍾意做到最壞打算，如果真係有咁嘅結局，有好多嘢要準備。屋租邊個畀呢？我全部準備好晒。」他指判決前王喜一番話令他個心「實一實」：「佢當講笑咁講：『你坐監我想像緊探你監會係點呢？』佢話唔喺探監名單上面，佢會唔好開心。」王喜笑住回應：「我仲要喺頭三位，冇面唔得㗎嘛。」
何以一直堅持上訴？志雲說：「我本來官司完咗有好多想法想同大家講，但到咗𠵱家呢一刻，已經冇乜嘢想講，我想講嘅，已經講咗，大家真係要珍惜香港有嘅獨立司法制度。因為有呢個獨立嘅司法制度，先有機會做到真的假不了、假的真不了。可能係身邊好多嘅朋友支持，先會咁堅持，都好想快啲完咗，我唔想繼續就係唔想人再提。我感覺就係畫上咗個句號，咁多年裏面，我要多謝呢啲天使們支持，坊間好多人支持，令我可以過番正常人生活。」
上訴得直當日，志雲曾表示支持他的人都是天使，那麼，在王喜心目中，志雲又是甚麼？王喜說：「佢係我嘅菩薩，好多人嘅菩薩。」王喜大爆無綫當日要裁員二百人，志雲於是約見這二百人，王喜說：「佢幫人搵埋工，被人炒嗰個咪『順』啲囉，起碼唔會對佢懷恨在心，呢個（炒人）唔係佢決定，係公司決定。」志雲笑住回應：「我諗佢過譽，今日諗番都覺得好難過，係令人遺憾事，詳情唔講，唔賴得公司，喺一個機構做咁耐嘢，好多嘢唔係一個人決定，因為一間公司有唔同崗位。」
王喜在志雲官司期間多次擋風擋雨。
資料圖片
愛情淡變友情
有王喜這個朋友是否無憾？志雲說：「有呢個朋友梗係高興、感恩。」笑問二人會否由友情昇華到愛情時，王喜笑指愛情轉淡後才變做友情，志雲就哈哈大笑謂：「咁你話有冇變到呢？」
志雲母親於二十多年前逝世，父親亦於2005年離去，志雲慶幸官司發生時父母已離開，他說：「好彩佢哋唔係度，如果佢哋仲喺度，我頂得順，但佢哋又頂唔頂得順？可能佢哋受到壓力。如果因為呢個壓力，令佢哋身體上唔健康，我嘅自咎感仲大，我另一個感恩，係呢件事發生喺佢哋離開之後，唔係在世時候。」
思念母親狂哭
王喜表示，之前志雲主演的舞台劇《沙士對比亞》跟今次《雷雨對日出》，不謀而合對話當中都涉及母親，志雲指排戲時一講到涉及母親的對白，也不期然勾起對母親思念而控制不到情緒狂哭，他說：「嗰種感覺係畀我好大嘅抒發，記番爸爸媽媽對你嘅愛。曹禺話戰士應該死喺戰場上面、作家應該死喺書枱上面、演員應該死喺舞台上面，因為一個人唔用盡佢嘅才智同經歷而離開呢個世界，係會有啲遺憾，係浪費你嘅人生，正因為你面對死亡，你係知道你嘅生命係有限，先要更加珍惜身邊有緣嘅人。」說時志雲望住王喜說：「好似呢啲人，無論係血緣或者友情都要珍惜。」
採訪：戴彩煥
攝影：沈健程
化妝：Tiffany Fong
髮型：Michael Lam of Beijing Hair Culture
場地提供：唐人館
|
鍾意就快D Share啦！
|
|
|