呢排唔少「巴打」晚晚吼住電視，就係為咗𥄫實「宅男女神」陳瀅BB，佢喺《全職沒女》入面嘅Body Language搞到一眾「巴打」暈得一陣陣，尤其陳瀅換上件「女僕戰衣」，攻擊力即時提升百倍，嘴嘟嘟，咬吓唇，仲瞓埋落浴缸濕晒身，呢種視覺福利俘虜晒萬千宅男。講到瞓浴缸呢招，真係拍得住當年大美人關之琳喺電影《夏日福星》裏面「透點浸浴」嘅經典一幕。你可能話陳瀅邊有得同大美人揮，但佢唔使靠「點」都散發出Sex Appeal，男人點會唔心郁？
嗱！舊年賭王四房公子何猷亨心郁咗啦，仲私有化埋，當時四太梁安琪都讚陳瀅又靚又乖，開晒綠燈仲唔係踩咗半隻腳入「豪門」？以為女神從此變鳳凰告別「巴打」，點知長期飯票就博唔到，快餐就食咗個，同何公子半年貨仔就Game Over，即時打回原形，由豪門抽番半隻腳出嚟，以為好陰功豬？錯！擺明係「靚抽」就真！陳瀅呢次「撇得合時」，冇咗拍拖包袱，唔使問男友攞Permit，冇埋豪門壓力，演任何角色當堂發揮得淋漓盡致，唔使吓吓勒住勒住！呢次陳瀅一個女僕上身真係冇得輸，分分鐘今年無綫台慶頒獎禮贏埋「飛躍進步獎」。
四千豪門為女開
以陳瀅嘅條件根本唔使愁，呢道「豪門」唔啱，總有一道豪門為佢而開，在最新全球財富報告指出，香港擁有資產淨值達2.34億港元或以上的超級富豪就有4,080人，陳瀅仲有大把機會嘅！佢一宣布單身，「兵哥」自動歸隊，當中有身家逾億「衣架大王」之子劉德俊，仲有甩拖成年嘅方力申都有份招入兵「瀅」，三更半夜飲酒傾心事，有兵哥圍住氹氹轉不愁寂寞，你咪以為佢恨做灰姑娘博有豪門長期飯票，佢本身都有家底，賺錢買Bra戴，去旅行唔係日本就係巴黎。百分百有青春又有本錢！
制服魔力男女通殺
就係個底夠厚先玩得起，陳瀅既有天使面孔，又具備魔鬼嘅膽色，乜都敢挑戰，前年為寫真集全裸上陣，因為攝影師一句：「呢個仙人掌背景，唔着衫影係最靚。」就膽粗粗脫清光，用隻貓嚟遮住三點，依家好多女藝人上位方程式，慣常手法係擺出最強「胸器」，當上位成功就宣布「封胸」玩從良，要佢性感少少就要有「商」有「糧」先有得傾，而陳瀅懂得「收放之道」，繼「裸」你命三千， 呢次演「沒女」姣到出汁， 一幕喺車廂濕身色誘張振朗，嗰句：「我姣你唔起呀？」直情姣到上沸點啦，邊個「巴打」可以招架得住？連披上外套遮背心僅得「一秒」的酥胸鏡頭，「巴打」都唔放過即Cap圖喪loop，真係心血少都唔掂。
至於「制服」呢個魔力最神奇係男女通殺，當日張智霖喺《衝上雲霄II》入面嘅「Cool魔」飛機師造型，就令佢事業再次回春變「男神」，所以陳瀅下次可以演空姐、護士榮登新一代「制服女神」，而且商機無限，外傭公司可以請陳瀅做代言人，一個女僕look出場講句：「乜乜女傭，安心聘用，乜乜女傭，融入家中。」或者不妨做生招牌，開番間女僕餐廳，就算個餐牌得常餐，都一樣有人仆住幫襯！
|
鍾意就快D Share啦！
|
|
|