賴慰玲（Winki）接拍無綫劇集短短兩年時間，已經參與10套劇演出，更不乏大製作，如《殭》、《迷》及《與諜同謀》，套套叫好叫座，令Winki人氣急升。性格爽朗、大情大性的她被網民封為最佳女友，現實中她有一位拍拖6年的男友，事業與愛情均得意，但原來熱愛演戲的Winki最初拍無綫劇只視為「兼職」，未有想過當明星。
適婚之齡欠衝動結婚
性格豪爽似足「大家姐」的Winki，其實是家中的孻女，萬千寵愛在一身。她以「perfect」來形容家庭：「我爹哋媽咪真係好perfect！佢哋永遠只會擔心我夠唔夠錢使，驚我養唔起自己。每次食飯我都話請，但佢哋又會偷偷哋去畀錢，成日叫我有錢就留番畀自己，真係好搞笑。父母就係咁，永遠都當你係小朋友，唔會長大。」踏入30歲，屋企人關心Winki的終身大事，她笑言隨時準備：「識我嘅人都知，我由細到大嘅人生目標就係18歲結婚生仔，但眨吓眼我已經30歲，我覺得我係差啲衝動。」Winki與舞台劇演員梁子峰拍拖多年，所欠的衝動是甚麼？「我覺得係一個時刻觸動到我哋，可能係一個婚禮、一套戲，有衝動去完成呢件事。」
入大染缸傾出友誼
除了賺取人氣，Winki認為更重要是獲得珍貴友誼。回想最初接拍無綫劇《女人俱樂部》時既驚且喜的心情，她都忍不住大笑起來：「嗰陣入嚟TVB拍劇，大家都話：『大染缸嚟喎，小心啲呀！』搞到我都有小小防備嘅心，所以初初拍《女人俱樂部》都唔敢太投入感情，但慢慢發現如果唔投入點做到好姊妹？所以就玩盡佢」不少人都覺得電視台人事複雜，但Winki則認為電視台相對地簡單，她解釋：「想認真做好件事嘅人有好多，大家都有共同目標，唔會有害人嘅心。每次攞到新劇本，我會諗咗套劇先，再同合作嘅演員慢慢傾劇本，傾傾吓就會咩都傾，然後個友誼就會出嚟。好似我同Anjay咁，我哋依家仲會傾電話，你話幾難得，依家仲邊有人傾電話？」
互改花名 兒童不宜
Winki透過不同劇集認識新朋友，每次提起她即露出甜蜜微笑：「其實都有啲surprise，同想像中有反差。其實每個地方都有好單純嘅人，都會有真誠嘅人。我哋成班女仔都好直接，好真心咁對一個人好。例如佢哋會見到一啲嘢，記得你鍾意食，就會買定，之後打畀你話買咗嘢畀你，嗰種有人記得你嘅感覺非常sweet。你有問題可以同佢哋分享，可以互相依靠。」問到她們有沒有「組織」的稱號？Winki笑言：「我哋真係有諗過，叫十魔女？十姊妹？但都唔係嗰樣嘢。（有冇一啲大家互叫嘅花名？）有，但兒童不宜，唔講得架！」說畢Winki哈哈大笑起來！
拍劇辛苦 心情超興奮
有家人和男友在背後全力支持，Winki在事業上可以放膽去試。她在劇集《殭》的紅髮造型，在觀眾心中留下深刻印象：「我最最最難忘一定係拍《殭》，經歷太多嘢！試過50幾個鐘冇瞓覺，喺又凍又攰嘅狀態去拍，但心情又超興奮，嗰種究竟係咩心情呢？真係好難忘！我哋拍攝嘅行程好緊密，但我個紅髮造型又要每15日就去漂一次頭，真係好特別嘅經歷。但係同一大班人喺荷蘭拍嘢，又好似去旅行咁，所以我同Grace（陳凱琳）同Anjay（陳嘉寶）真係患難之交！」演員深刻的感情透過鏡頭與觀眾分享，而Winki在劇中的亮眼演出，更被網民封為最佳女友的典範。
向目標進發
加入無綫後，Winki得到觀眾的認同，並遇上一班知心好友，所有都是她始料不及：「我係想做一個演員，唔係一個明星。我係想做戲，我當初冇諗過入TVB會拍咁多套劇，只係當係freelance嘅其中一份工。本來諗住做完一個job之後繼續教小朋友做舞台劇，點知拍完一套後，有監製問我試唔試第二套，跟住第三套、第四套，好似覺得自己係轉咗行。我從來冇諗過要入TVB做明星，我諗法係演員有唔同演出機會就要去試。我好記得一句說話：『眼望星星，腳踏草根。』提醒自己所有只係開始，當我依家搵到目標，就一步步向前面進發。」
|
鍾意就快D Share啦！
|
|
|