組合Super Girls成員Yanny及Heidi被東網率先爆因爭有米音樂監製陳考威（Gareth）而反目，據知Heidi一直恃靚四圍冧仔，被Gareth飛甩後，已轉冧時裝店高層，兩人拍拖年多，但她仍然對被飛心有不甘，故遷怒現與Gareth拍拖的Yanny，知道被踢爆小氣在社交網unfollow Yanny後，不在香港的Heidi一直潛水龜縮，直至晚上終於蒲頭回覆東網：「我知道他們拍拖嘅！都係想大家開開心心！多謝關心！辛苦晒！」
Yanny：佢應該冇放唔低
而另一女主角Yanny在電話中力撐Heidi：「我哋五個有喺電話group討論，大家互相扶持，覺得唔好影響工作，覺得要更加團結，有咩風浪一齊面對。（覺得有人對上次戀情耿耿於懷？）應該冇放唔低，佢係好好女仔，唔會畀小小事打敗到。（覺得Heidi疑似放料？）冇，唔係事實。」她亦否認有報道指她玩分化排擠Heidi。
至於男主角Gareth坦言女友Yanny被圍攻感不開心，他man爆表示：「總之我會喺身邊陪佢，有咩一定會保護佢！（你上次同Heidi拍拖搞到不歡而散？）我哋一直都係緋聞男女。（有冇同Heidi聯絡？）除咗音樂之外，我哋好少聯絡。」他強調完結上段感情後，隔了很長時間才展開今次新戀情。
Jessica：Heidi冇耿耿於懷
而隊友Jessica則謂Yanny曾在電話group中向其他成員透露拍拖一事：「知佢哋拍咗一段時間，我、Yanny同Gareth好好朋友，因為我哋冇乜人約，所以成日約埋一齊睇戲食飯，但佢哋幾時拍拖真係唔知。」講到Gareth與Heidi曾傳緋聞，問是否有人對兩人拍拖耿耿於懷？她謂：「唔係好清楚，但Yanny有喺我哋個group交代清楚，每人都知道。（Heidi嬲？）冇喎，反而之後我哋坐車去做嘢大家仲攞嚟講笑，相信佢唔會耿耿於懷，佢哋都冇不和。」
講到有指Yanny搞分化玩小圈子，她即嚴肅幫對方澄清：「絕對冇可能，Yanny嘅性格唔畀人蝦都戥佢開心，佢係極善良嘅女仔，點識搞分化，佢好為人設想，個group根本冇分化。（你做和事佬難做？）唔覺佢哋不和，報道出街後我哋五個有喺group講嘢，Heidi同Yanny仲叫大家加油、一齊面對，我哋另外三個都有叫佢哋兩個唔好唔開心，喺group到大家團結鼓勵大家。（覺得Heidi疑似放料？）唔會啦，佢唔會做啲咁嘅嘢。」
|
鍾意就快D Share啦！
|
|
|