「有人用我名恐嚇法官」
王喜因志雲 廁所被捕
王喜與陳志雲相交相知25年，互相扶持走過高山低谷。志雲被涉貪案纏擾7年的日子，王喜每次都陪同出庭，昨日王喜接受商台訪問時，大爆有次陪志雲在法庭應訊時，在廁所內被警方拘捕，理由是涉嫌寄信恐嚇主審法官。而在這7年間，王喜跟志雲成了生死之交。
王喜昨日自爆當年為陳志雲而遭警方拘捕一事，理由是涉嫌寄信恐嚇主審法官。
年近半百的王喜原名鄺毅怡，年輕時曾加入過香港皇家警隊，他與現年58歲的陳志雲相交25年，始於92年二人同在商台任職。過去7年，志雲被涉貪官司纏身，王喜風雨不改一直陪摯友出庭，為他擔遮開路。近日，王喜跟志雲合作舞台劇《雷雨對日出》，昨日王喜在商台接受訪問時，爆出當年因為支持志雲，而遭拘捕的往事。
王喜昨日現身商台，曾是警察的他直言被捕落口供，打擊很大。
志雲（左）被涉貪官非纏擾7年，與王喜攜手經歷風雲。
要落口供受打擊
提到這段小插曲，王喜語帶輕鬆回憶當日細節：「呢7年裏面我陪陳生上庭，其中一次上庭時，上午有個小息去咗廁所，去緊廁所嘅時候有4個便衣表露身份夾住我，話主審法官收到一封恐嚇信，內容我唔方便講，佢哋話恐嚇信下款用咗我個名。之後叫咗我返警署，落咗人生第一份口供，以前我幫人寫，𠵱家證人、犯人調轉咗，對我嚟講好大打擊。最後都冇被起訴，但都唔記得有冇收過『終止調查通知書』。」
王喜透露落完口供被帶返屋企搜屋，但沒有帶走任何物品，到下午就返回法庭陪志雲，當時才發現警方已一早部署警員在場，看看有沒有可疑人士及保護法官。他表示被拘捕時並不擔心，因為確實沒有做過相關事情，當時亦有向志雲提起：「嗰時佢大單啲，佢煩緊，唔想佢有額外嘅壓力，所以講過就算。佢（陳生）有安慰，知道唔會有事，我都唔想佢花力氣去安慰我，第一我知唔會有事，咁都入（罪）嘅話就要搞移民啦。」
回想這7年，王喜領會到朋友間的相處很奇怪，會有很多考驗：「之前同陳生交往唔係好深，當年喺電台佢係高層，我係小DJ，直到呢單嘢發生後有好多考驗，例如佢信唔信我，我信唔信佢，發生咁大件會對身邊人懷疑、猜度，呢件事我哋印證咗生死之交，當然賭注好大。係日久生情，友情生咗25年。」
王喜（左）為了不想打擾當時有官司在身的志雲，被警方拘捕一事只向他輕輕提起。資料圖片
王喜加入娛樂圈前曾當警察，他於劇集《吾係差人》亦演過警員。劇照
出新歌回歸樂壇
講到今次舞台劇與志雲第一次同台合作，代表可以平起平坐，王喜說：「佢係主角，我唔係。之前好多老闆都覺得陳生好幫得手，陳生有票房，唔使擔心，又會帶好多名人政客做座上客，得一主角不如得一陳志雲，佢對舞台劇嘅認真態度，刺激到其他演員，唔係浪得虛名。」
除做舞台劇，王喜於聖誕節重回樂壇出新歌，他透露早前應亞洲音樂節邀請，上台唱了兩首歌，表演後有公司欲簽他做歌手，王喜說：「下星期會再傾，做得嚟最快聖誕會有歌出。」
採訪：羅慧敏
攝影：陳俊強
|
鍾意就快D Share啦！
|
|
|