熱爆娛樂: 波叔膚淺對膚淺 [壹週刊 - 1421

2017年6月1日星期四

波叔膚淺對膚淺 [壹週刊 - 1421 - 財經] __,波叔,陳茂波,M1,

陳茂波所屬的香港會計師公會，行內人謔稱為華人會計師公會，專門服侍中小企老細。

中環人語

波叔膚淺對膚淺

財爺陳茂波（波叔）兩度反駁穆迪（ Moody's）調低香港評級，大概話祖國經濟強大，香港又衰得去邊云云，插穆迪理據膚淺咁話，其實被評級機構 down grade，作為國際金融中心影響層面深遠，波叔雖然都係專業會計師，但此舉暴露其膚淺一面，他非 Big Four出身，所屬的香港會計師公會，俗稱華人會計師公會，專門接中、小企生意，波叔可能慣咗服侍中、小、微企老闆，一時間適應唔來以此思維來說話；中、小企有乜幾何發債籌錢，唔搵穆迪或標普等評級機構為發債做評級，都幾難有投資者落疊， rating一跌，債價息口都受影響；香港係國際金融中心，雖然唔少國內企業發債都冇 rating，一樣有銀行買，但此乃閂埋門自己友打麻雀抽水伎倆而已！

九七年金融風暴，穆迪將香港評級下調，時任財政司的曾蔭權曾以「二流分析員」作回應，但阻不了金融危機的發生。

John Moody於一九○○年創立穆迪投資服務，因一九○六年睇準經濟危機及早提出警告而名噪一時，他於五○年去世，但至今威力尚在。

李寶安睇晒 TVB

TVB早前提出回購股票方案有阻滯後，仲被踢爆來自大陸的黎瑞剛才是終極大股東，涉違反廣播條例，接住主席殼王陳國強又墜機執番條命仔，在此多事之秋，公司有乜風吹草動都會搞到人心惶惶， Big Four會計佬出身的行政總裁李寶安聽講進一步控制 TVB營業部，呢個部門本來係由老臣子鄭善強（ S.K）揸旗，以往坐鎮銅鑼灣禮頓道，家陣都要搬返將軍澳電視城坐七樓，李寶安又引入亞視的 David徐及謝偉光出任助理總經理，以接手營業部，此舉令人推測是架空 S.K的布局，不過李寶安有 track record，在林伯掌管亞視期間曾令亞視轉虧為盈，即使林建岳高價買富麗華酒店一役弄致債台高築，都發揮其鍊數本色減債救亡得而保命，今鋪可謂英雄有用武之地。

鄭善強（右）是 TVB營業部老臣子，本來坐鎮銅鑼灣禮頓道，現被調返將軍澳電視城七樓。

李寶安

鄭善強

中環寸嘴　拒絕被四叔「包」起個場

楊國佳

返溫哥華 Factory Outlet𥄫吓逛吓。

工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。

返去溫哥華打個白鴿轉，臨走前梗係去前遠東交易所飲食部大佬——海棠酒家搵「棠叔」食番餐清清哋嘅順德手勢。吖，咁啱俾我撞到玄學大師蘇民峰，佢都懂得去溫哥華有山有水吸吸靈氣，又「奶」架步，識得走嚟搵「棠叔」搵食。有時食幾多著幾多整定，四叔李兆基想嚟食，棠叔怕地方細招呼唔到，而拒絕被「包」個場，皆因四叔子孫保鑣眾多，加埋其世姪，溫哥華僑領湯馬仕馮（馮景禧長子馮永發），一大棚人㗎！

返到港，開雪櫃飲支日本仔「神能水」，嘩，真係咁×清涼，仲正過我返加拿大飲嘅冰川水，呢支嘢係有條友醒我，話成三百幾蚊一支，加埋運費成八嚿水，真係一支水都講功架。條友仲話好難先至班得到，因為貨唔多，唔好以為有錢就買得到，初時仲以為係乜鬼傳銷伎倆，搵人 check過又唔係，有時乜都要試吓，但飲上癮唔知點搞，我都幫你唔到

記得我老頭子講，六十年代帶過唔少當時仲未係猛人嘅朋友，去日本歎男女共浴溫泉，如果唔係又點會有條友醒我支水呢啲回報吖！

海棠海鮮酒家位於溫哥華 Richmond的 Johnson Centre。

蘇師傅識嘢，去海棠搵「棠叔」食順德菜。

呢支水來自日本愛知縣土佐養生園，兩公升計埋運費成八嚿水港銀！

靚酒+股票=夢寐以求飯局

呢排富豪飯局，唔係講食得有幾「貴」，而係要有台型，請到位 Master of Wine——葡萄酒大師傍住教飲靚酒，邊講邊食此為之高尚情操也，要獲此資格殊不容易，自一九五五年起全球得 358名人士考獲此資格，香港只得兩名，包括是全亞洲首位女性獲 Master of Wine資格的美籍韓裔 Jeannie Cho Lee（李志延）這酒界大紅人，近排因主持一個靚酒電視節目而人氣急升，愛酒之人都想與她飯局品酒，而 Jeannie Cho Lee的老公 Lee Joseph B，就是美銀美林亞洲股票銷售部阿頭，兩夫婦簡直係 perfect match，一餐飯局美酒加埋靚股票，成為城中大客夢寐以求飯局。