歌神張學友大女張瑤華（Zoe），早前被指與外籍男仔Mathis拍拖，在其社交網內又有二人攬攬合照等，Mathis事後向東網表示自己目前單身。而今日隻身返港的學友，現身機場時即為囡囡澄清緋聞，更大爆囡囡現時單身，亦未有拍拖的打算。
囡囡現時單身
學友向現場記者表示，有過問女兒是否拍拖：「佢話暫時未有呢個興趣住。（你贊成？批准？）老實講佢哋細個保護佢時就好憎呢件事，咁依家都16、17歲，過多一個月都17歲，佢真係有識朋友，只要正正常常都唔覺得係咩大問題，或者唔好影響到學業。當然做我哋啲小朋友都困難啲，或者佢哋覺得影張相都會畀人講，佢自己都覺得係難處理啦，咁細個，影響到其他同學更加唔想。（阿女有為此唔開心？）咁梗係會唔開心嘅，咁我做緊騷，都用咗啲時間同佢解釋，成件事係點，點解會發生呢件事呢。大家都見到，始終我個女由細到大都係讀國際學校，比較洋化啲，同埋佢啲同學大部分係外國人，佢都係習慣咗佢哋啲文化，同佢解釋咗係文化分別，我都係關心佢啦，因為佢係被關注咗，同佢講咗，我唔想阻止佢哋用社交媒體，咁我都想佢哋知道佢哋嘅媒體都會被關注，佢都有話自己已經好小心喎。我話畀佢知呢個誤會，咁啱佢呢個朋友無用一個真正身份擺上去，先有呢個誤會話佢結咗婚。大家用常理推測都知佢咁細過，跟住會去外國讀書。」
慶幸囡囡經歷緋聞：等佢知道做娛樂圈壓力大
問到會否接受未來女婿係外國人？學友表示：「我都理唔到咁多啦。（教佢睇清楚？）呢個自己都會嘅。（帶畀你過目？）都冇意思嘅，通知我得㗎喇，知道咗咪算囉，我都會畀啲自己曾經係男仔、過來人嘅身份畀意見，衰梗㗎嘛其實，講定畀佢知自己有心理準備。（太太羅美薇點睇？）佢都係好理解件事嘅，成件事冇咩，不過就希望大家體諒吓藝人下一代都係困難，都係有壓力。我哋都係希望佢哋健康啲正常成長，如果小啲受關注的話，發展過程會正常啲，否則我哋都要做好多功夫去同佢講，不過呢個都係我嘅工作之一，幫佢哋度過唔同人生關口，大個啲就要佢自己去面對。如果成長過程係真係唔係好順暢、唔係好正常咁成長，只係擔心佢哋大過咗之後睇嘢、處理事嗰個判斷力有啲扭曲，呢個我唔係好想，除非佢好想做娛樂圈啦。咁呢件事都好嘅，等佢知道做娛樂圈壓力好大。」
尊重囡囡意願可能留港發展
問到會否再送女兒出外國讀書，他表示：「佢自己揀，我唔係好想或唔係好相信一定讀外國名校，出嚟先可以係叻，或者對社會有貢獻同作為，呢個唔係咁相信。經過有上次經驗，佢上次唔係咁適應，佢本身係唔適應，唔想勉強佢，等佢自己決定。做父母都係配合佢。（未有出國打算？）佢仲有一年讀，讀埋先，畀佢自己考慮清楚先，有傾嘅。」
冇Add囡囡社交網
對於女兒被指為「翻版舒淇」，學友笑言：「咩都有人講㗎啦。（都好多人講話似媽咪羅美薇。）係冇人話似我啫。」學友又透露今次是囡囡主動搵自己，表示被一些事情困擾，而學友又自爆未有加女兒的社交網為好友，避免囡囡覺得自己被監視。
|
鍾意就快D Share啦！
|
|
|