大台清談節目《關你家事》上個星期播出，聽個名就知，係講各個嘉賓嘅家庭狀況，不過「家家有本難念的經」，當中緣由，實在不足為外人道。所以節目截至9號下晝5點，通訊局已經收到共16 宗投訴。（新聞連結： http://bit.ly/2tcwFWa ）呢個節目，除咗有人分享家庭相處之道，難免會觸及到一個問：第三者。喺節目未出街之前，已經有報道預告咗話題會涉及黃宇詩同埋佢嘅測量公司董事男友彭慶餘（Peter），因為節目邀請咗 Peter前妻Cady做嘉賓，直指黃宇詩係「第三者」。黃宇詩同Peter早年已多次被影到拍拖，今年初有周刊再影到兩人拍拖，並以小三變正印形容黃宇詩，其後黃宇詩喺《蘋果》解釋，12年先正式開始呢段關係，唔係小三亦唔想背負莫須有罪名。而Cady喺同日接受《蘋果》訪問，反駁黃宇詩提供版本之時序 。（新聞連結： http://bit.ly/2s10mK3 ）噚日嗰集《關你家事》，分享家事嘅嘉賓正正係Cady，雖然半小時節目入面，一句不提黃宇詩同 Peter名字，但喺模擬片段入面，就提及第三者係公眾人物，矛頭直指黃宇詩。Cady先喺節目形容佢同丈夫嘅係關係，話小三出現係：「一隻掌拍唔響。經濟、溝通、處理小朋友上，都有問題。」Cady仲話係一個課程入面，察覺到前夫同小三有感情進展，至於點解會證實係出軌，Cady話：「新聞出囉，報紙出囉。」、「雖然唔係拖手，點解咁多個唔影會影你哋呢？咁多巧合？咁多次？」呢集《關你家事》仲講到Cady喺半年前同一位男士拍拖，但模擬片段就指，呢位Cady口中嘅小三，向傳媒舊事重提，將Cady照片公開，影響到佢嘅生活。Cady形容：「作為一位藝人，始終要有新聞，好嘅消息係新聞，壞嘅消息係新聞。」佢又提到婚變期間，即男方堅持要搬走時，仔女有安慰佢，令Cady感到不少安慰。講到傷心處，Cady亦不禁流淚。呢集節目，Cady有好多分享，間中有少量穿插專家意見，教人點處理小三危機，真係多謝晒。
| （電視截圖） | | |
| | | |
| | |
|
鍾意就快D Share啦！
|
|
|
