袁文傑外形討好、口才了得，拍劇以外，也當司儀，難怪大台誓要簽他做親生仔不可。
探熱針
大台加戲 𦧲「游生」袁文傑簽做親生仔
憑《不懂撒嬌的女人》「游生」一角彈出的 45歲高佬袁文傑，捱足 27年，終於等到上位機會。近日廣告接唔停的他，被大台盯住，狂𦧲簽經理人約做親生仔，但袁文傑要自由，拒絕綁死大台約。
視他為潛質股的大台，為表誠意，安排他在新劇《果欄中的江湖大嫂》孭重戲份，同女主角陳煒有感情線。反而孖住黃浩然做男二的楊明成為犧牲品，戲份係咁 cut。
曾是大台棄將
擁有六呎二吋標準 model身高的袁文傑（ Andrew），入亞視前，其實是大台棄將。九○年他先投考大台藝員進修班入行，惜一年後畢業，大台嫌他身形過高，沒跟他簽約。去年亞視倒閉，袁文傑就算終得大台收歸，亦只是跟他簽一年部頭合約。
風水輪流轉！《撒嬌》劇本好演員好，幾乎所有主要角色都跑出，連戲份不多的「游生」袁文傑都掂埋。近期他頻接廣告賺到笑，後知後覺的大台，即斟袁文傑簽做親生仔。
「其實舊年 Andrew一口氣拍咗三套劇，今年三月《撒嬌》未播前， TVB見 Andrew啲戲都唔錯，已經提早同佢續兩年部頭約，綁住佢先。點知佢喺《撒嬌》一嘢爆發， TVB怕走寶，即𦧲佢由部頭轉親生仔合約，不過 Andrew自由咗咁多年，明知 TVB規矩多，點都諗清楚！加上依家幫佢接 job間公司係 friend底，酌量抽少少佣，咁 Andrew變相淨袋，簽 TVB就冇呢支歌仔唱。」一知情人說。
cut楊明戲
袁文傑拒絕做親生仔，但大台今次志在必得，為表誠意，開拍中的新劇《果欄中的江湖大嫂》，刻意安排他在其中，且戲份愈加愈重。
「呢套劇男、女一係陳煒同黃光亮，黃浩然同楊明齊齊做阿二。而 Andrew個角色係新加嘅，條線會寫佢同煒哥嘅感情轇轕，好有發揮。今次公司明俾位佢上，寫重咗佢啲戲，削弱咗楊明啲戲，雖然阿楊話就話男二，但已經虛有其名！」知情人續說。
女友水泡
在大台變了搶手貨的袁文傑，在落選港姐、前大台兒童節目主持女友張潔蓮心目中，同樣是暖男一名。已轉行任職幼稚園教師的張潔蓮與袁文傑拍拖六年，已同居階段，袁文傑早前透露兩年內儲夠錢買樓便會迎娶女友。據知張潔蓮多年前曾經歷婚姻失敗，與導演老公離婚傷透心。幸好袁文傑的出現，逐漸撫平了張潔蓮的傷口，令她重新再愛，投入新生活。
撰文、攝影、攝錄：娛樂組
|
鍾意就快D Share啦！
|
|
|
