阿梅紀念館鬧租務糾紛
梅媽轟謝偉俊唔賠償
今年10月10日是一代天后梅艷芳的54歲忌辰，梅媽覃美金除了為爭亡女近億元遺產的是非停不了，最近更因租地方成立梅艷芳國際紀念館，跟業主謝偉俊和白韻琹爆罵戰，她狠批白姐姐代表簽了臨時租約，但其後謝偉俊卻反悔兼拒賠違約金，梅媽扯火大罵：「邊有咁無賴㗎！」
梅媽斥責謝偉俊拒出租又不肯賠違約金，指對方是無賴。資料圖片
現年94歲的梅媽覃美金、72歲白韻琹和58歲謝偉俊（Paul），三人加埋224歲，雖然年紀大但火氣依然好猛！讀者陳先生向本報爆料，指日前梅媽和兒子梅啟明以「梅艷芳國際紀念館有限公司」名義，以月租44,000元租用銅鑼灣海灣大廈某單位，但業主簽臨時租約後反悔，陳先生為梅媽抱不平：「單位係謝偉俊嘅公司持有，白姐姐代表簽咗臨時租約，夜晚就話成份嘢唔見咗，要梅媽再開支票。點知隔兩日，謝偉俊話唔想出租，正常撻定要賠一個月，但佢退票就算，唔肯賠償。」
謝偉俊位於銅鑼灣海灣大廈的單位屬於其公司物業，他指公契訂明只能作住宅用途。
今年10月10日是一代天后梅艷芳的54歲忌辰，梅媽向白韻琹和謝偉俊租地方用作梅艷芳國際紀念館，三人因租務問題爆發罵戰。
梅媽與長子啟明多年來為梅姐遺產，與匯豐信託打官司。資料圖片
白姐姐稱未瞓醒簽約
記者前日致電向梅媽了解，她大動肝火：「佢突然間唔肯租喎，正衰人！咁衰格，就咁畀番張票我就算，邊有咁無賴㗎！謝偉俊呀，佢恃住佢係律師，佢話乜嘢，我唔收張票就告佢啦。我又唔係要求你多，你唔租畀我，梗要畀番（一個月賠償）我。」問到對方為何拒租？梅媽沒好氣說：「佢話業主立案法團唔畀，後來就話唔係幾方便，我有知名度，佢又有知名度。」
簽臨時租約的白姐姐反擊梅媽說：「佢咁講對我唔公道，佢老人家唔同佢計較！從來冇反悔呢樣嘢，因為租樓有程序，但阿Paul話情願留嚟招呼朋友。」當日白姐姐為何肯簽呢？她說：「佢哋（經紀）嚟撳我屋企門（鐘），我都未瞓醒，唔記得清楚佢哋點講。有啲人陰陰濕濕攞嘢畀你簽，你都冇睇清楚畫隻龜仔喺度，唔出奇㗎！」對於梅媽不忿拒租冇賠償，她反斥：「點解要賠畀佢？因為我冇攞過佢任何着數。阿Paul係律師，我係主婦，唔會撩事鬥非。」
謝偉俊強調白姐姐被誤導簽署臨時租約，雙方仍未達成協議。資料圖片
謝：違反咗單位公契
至於身為業主兼律師的謝偉俊則稱：「樓本身只係可以用作住宅，而臨時合約有條文講到明要嚟做歌迷會活動，白姐姐簽咗返嚟，我睇到覺得有問題，於是要將條文刪咗去，準備交番畀agent處理，但嗰個agent可能心急，又再拎第二份畀白姐姐簽，亦講咗啲說話，令白姐姐以為咁簽就冇問題。白姐姐唔記得第一份喺我度處理緊，佢以為唔見咗，所以求其咁簽番。總括嚟講係雙方未達成協議情況，文件喺不適當情況下簽署，亦違反咗有關單位公契，我代表公司唔接受呢份臨時合約。」
謝偉俊指支票沒入銀行過數，事件仍在談判階段：「白姐姐被誤導簽名係非常之不幸，所以我話最好大家撤銷協議。」對於梅媽想追討一個月賠償，他說：「如果佢為臨時租約要告我哋，我哋咪打官司囉，以我同白姐姐背景，唔可以隨便違規，唔單止有法律上問題，亦有傳媒監察。」
採訪：皓騫
|
鍾意就快D Share啦！
|
|
|
