幾時都話女人係善變，32歲嘅袁嘉敏今年推出《親蜜》散文集加半裸相集，之後話會淡出幕前封胸做OL工作！(新聞連結：http://bit.ly/2uJh7gM)點知今日袁嘉敏現身書展，為佢本寫散文兼相集舉行簽名會，封晒胸著住一條黑短裙嘅袁嘉敏，講到佢真係封咗胸，佢話：「之前性感係因應廣告客戶或者主辦商嘅要求，我本身鍾意舒服同平實嘅打扮。」今次半裸係咪冇底線？佢就話：「我做埋美術指導、寫文章，俾大家了解我多啲，所有構圖係配合文字，內容提及拍裸露戲同鴨王嘅一啲經歷，有全裸相喺書裡面，如果有藝術家或者攝影師想邀請我拍攝美術或者美感比較高嘅相，而有需要去裸露嘅話，我都會去考慮。」之但係你唔係話自己唔再性感？袁嘉敏話：「我一直都係咁樣講，只不過要睇project，我都唔係年年出一本裸露寫真，影呢啲相係最後一次，如果反應好，下年再出書會著啲時裝或者晚裝！」咁佢係咪唔再拍裸露嘅電影？佢話：「聽日開工做演員，之前拍咗一套英文電影，要補戲，唔使露，不過我手頭上有劇本傾緊，3日前見過導演同監製，佢哋都想我裸露，但係我唔想露，導演就話不如睇吓開工嗰陣嘅心情先決定。」袁嘉敏繼續話：「我覺得不如O依家決定，喺合約白紙黑字寫明，我覺得劇本好好，故仔好有意義，只係佢哋想誇張少少，但係我唔想露點，開片酬俾佢慢慢諗。呢部係港產片，我係主演角色。」如果有好酬勞又會唔會考慮？佢話：「唔想再露，呢啲戲份成日蓋過劇本同演技，埋沒咗故仔，抹殺咗演員嘅演技。」查實除咗唔性感之外，袁嘉敏言之鑿鑿話淡出幕前，佢就解釋：「戲唔係即刻開，8月會做Marketing嘅OL，到時要兩方面傾，呢個劇本好突破同有發揮，如果拍得好會係一個滿意作品，可能到時Marketing老闆唔滿意我，做兩個月叫我走呢？」袁嘉敏跟住又話：「我係宣佈淡出，但係我好仰慕呢個監製，劇本有心思，抽時間傾一傾，不如咁講，我唔係退出，之後有啲善事親善活動會做，我唔係唔係與世隔絕，好電影客串下都會！」
| （寫真集圖片） | | |
| | | |
| | | |
| |
|
鍾意就快D Share啦！
|
|
|