噚晚張智霖、鍾欣潼（阿嬌）喺將軍澳出席《京城82號II》嘅首映，阿嬌着住一套黑色嘅露腰連身裙現身，可以睇到佢瘦咗唔少，就連張智霖都話阿嬌瘦咗好多，喺祝酒嘅時候，阿嬌就成杯酒飲晒，仲將隻杯丟落地下。張智霖又話阿嬌拍戲嘅時候冇o依家咁瘦，佢話：「係兩種唔同嘅美感，珠圓玉潤有珠圓玉潤嘅靚。」阿嬌就話當時嘅戲服大件啲，所以遷就返套戲服。問到阿嬌點樣減肥，佢就話：「之前荷爾蒙失調，睇咗醫生，應該好番喇，o依家會注意，少食多餐同埋做運動，因為我背部冇肌肉支撐，右手冇力，可能啲神經壓住條頸，過兩日會去睇醫生。」阿嬌話係之前去完雲頂之後就係咁。阿嬌之前就開直播，網民就不停咁講陳冠希，阿嬌忍唔住低頭兼哽咽，噚晚佢就話：「當日我做咗個live，我冇唔開心，只係條頸有少少痛，郁唔到，加上有少少亂，唔知啲網民想我點答咩，其實我都冇乜點睇留言，又唔係專登望住電話，只係個mon太高，我條頸又抬唔高，所以工作人員畀咗個電話我，我就低頭睇住個電話，其實當時啲留言都快得滯，所以都唔係好睇到。」講到蔡卓妍（阿Sa）o依家有拖拍，阿嬌會唔會羨慕？佢就話：「個個都會拍拖啦，唔通人人都要想拍咩？o依家未遇到對象。」問張智霖會唔會介紹啲男仔佢識，佢就話：「吓，又係我？我身邊都好多剩女，男仔要加把勁，同埋我都唔做媒人，如果人哋唔啱咁點算？同埋我身邊啲男人都係走冇鬼用路線。」
|
鍾意就快D Share啦！
|
|
|