馬國明 黃心穎撐枱腳 急返歸避風頭
颱風「洛克」旋風式襲港，情侶搞乜好？被封「圈中筍盤」的馬國明，在前日一號風球下，做柴可夫親自往接載緋聞女友黃心穎外出睇戲兼撐枱腳，馬國明全程雙手插袋，怕與心穎BB有身體接觸而暴露戀情。兩人玩足四粒鐘，馬國明擔心BB被風吹走，睇完戲急急去攞車送返香閨。
現年43歲的馬國明與28歲的黃心穎緋聞傳出多時，亦曾多次約會斷正，但一直未正式公開戀情。早前心穎BB出席朋友結婚派對，被指背住緋聞男友馬國明夜蒲，兼被「溝女王」周志文力追，心穎BB事後已澄清與周志文不熟，未曾約會過。不過，剛拍完無綫劇《宮心計2深宮計》回港的馬國明，為保「男友」地位，前日做柴可夫親自前往接載心穎BB到九龍灣拍拖撐枱腳。
尷尬笠帽戴罩
約下午6時，馬國明駕車到心穎BB位於油塘的寓所，然後驅車往九龍灣拍拖，當二人被撞破好事，起初顯得一臉尷尬，之後友善向記者微笑打招呼。泊好車，兩人似乎怕被人認出，馬國明即戴帽，而心穎BB則戴上口罩，當行至人多的地方時亦保持距離，馬國明雙手全程插袋，一時又雙手放在身後。邊行邊傾的二人雖然冇拖手仔，但搭扶手電梯時，終於出現手臂揩手臂，兩人又不時對望，之後進入該處餐廳醫肚。
邊食邊傾甜到漏
進入餐廳後，心穎BB即除低口罩，與「男友」面對面坐邊食邊傾，期間更不時望住男方甜笑，撐完枱腳，他們步往附近戲院買飛入場睇戲。至晚上10時戲院散場，戴住口罩的心穎BB與馬國明率先步出戲院，未知男方是否怕稍後會掛更高的風球，「拍拖」四粒鐘急急去停車場攞車送心穎BB返香閨。
文、攝：追蹤組
來源 source: http://orientaldaily.on.cc
|
鍾意就快D Share啦！
|
|
|
