陳豪谷爆43吋巨胸 陳茵媺讚Hot Baby
陳豪最近為新劇操出史上最強爆肌Body，日前更在一場赤膊攀石戲中以超粗麒麟臂加43吋巨胸大騷雕塑級男性霸氣魅力！而老婆陳茵媺不諱言回港見到老公時忍不住「嘩嘩」聲，更心心眼大讚對方是她的「Hot Baby」，又指自己受老公感染而做Gym，並參考其地獄餐單誓做最弗Couple！
現年46歲的陳豪（阿Mo）雖然有令人羨慕的六呎身高，但身形間中卻被指脹爆，極有爸爸Feel，其肚腩大小亦時常受人關注，更被指時大時細猶如鬼影變幻球，試過由2007年拍《珠光寶氣》時最瘦的29吋腰，日久失修到2009年拍《宮心計》時的38吋腰、210磅重的水桶身形！
一星期操足六日
不過，阿Mo最近就為無綫50集重頭劇《誇世代》操出史上最強Body，43吋胸肌配六舊完美腹肌，更在日前拍攝的赤膊爆肌攀石戲份中，以超粗麒麟臂抓實岩壁咇出青筋，盡顯力量的美！他雖然在牆上爬足幾個鐘頭，但落地時就勁從容零喘氣，加上用肌肉堆成的Body掛滿豆咁大粒的汗珠，簡直是男人魅力大爆發！他接受本報獨家訪問時直指現在是人生中最大隻的時刻，更指行內數一數二大隻的張繼聰是其半個恩師：「佢開頭幫我搞好個身體，再帶我去做Gym，不斷喺我身邊鼓勵我！」
問他會否感到辛苦，阿Mo即直指自己非常捱得：「我好堅強！依家飲食方面都關注多咗，成個生活方式唔同咗，好想保持住呢個咁健康嘅狀態，之後都想Keep到咁大隻。」據知，向來嗜甜食的阿Mo為操出霸氣爆肌而戒口，除了所有食物都要走糖走鹽走油外，每餐的肉類、澱粉質和蔬菜數量都要量度得清清楚楚，計好晒所含營養至放入口。當然單靠飲食不足以打造此弗爆身形，不斷入健身室狂操的他非常勤力，一個星期七日只休息一日，其餘六日都特意撥出三小時做勻全身肌肉訓練，認真犀利。
誓同老公鬥腹肌
老婆陳茵媺（Aimee）亦對阿Mo的完美Body讚不絕口。與老公闊別個多月後，前晚她帶住三子女從多倫多回港，她更透露一見老公即忍不住「嘩」出聲：「佢真係Fit到爆！好欣賞佢咁努力，好戥佢開心，真係落咗唔少苦功，唔係容易。」更直言老公是其「Hot Baby」！而昨日為英皇電影《日月星》開工的她透露受老公感染，在多倫多勤力做Gym：「每日做個半鐘，佢教我點食嘢，狀態好過以前。」又指與老公鬥Fit：「我同佢鬥緊，睇吓邊個腹肌最大！」
問到在多倫多期間，阿Mo有否隔空出冧招，她坦言離港後互相掛住對方，更指老公有驚喜送花：「最緊要大家保持聯絡，永遠最Sweet嘅都係說話上。」又笑指三個小朋友回港見到阿Mo後，即嗲爆爸爸兼唱歌仔畀爸爸聽。
文：影視組
|
鍾意就快D Share啦！
|
|
|