四哥喺節目中，自嘲係「不知所謂」嘅爸爸，管教霆鋒同婷婷，係狄波拉嘅事。四哥形容話：「拉姑係賢妻，但唔係良母，因為佢好嚴厲！」雖則話再見亦是朋友，但離咗婚都依然係好朋友，仲要同前妻現任老公有偈傾，相信好似四哥咁豁達嘅人，冇乜幾多個。四哥就笑住話：「有次拉姑揸車嚟接我，佢老公都有嚟，仲坐喺前座。我一上車就同佢講：坐返後面，我係前夫梗係坐前面」之後，四哥仲開心share同拉姑辦理完離婚手續後，二人竟然喺街上擁抱起嚟！四哥笑話：「因為太開心，我仲抱住佢轉咗三個圈，睇到我哋雙方律師都呆咗，哈哈！」至於，四哥同現任女友Coco拍拖已逾10年，四哥坦言唔會再婚：「名份係假o架！兩張婚書我都撕爛咗，仲結嚟做乜！況且我都80後啦，所以我同佢講，遇到個好嘅就走」四哥真係好豁達，亦好坦白，鄭紹康笑問佢今時今日係咪仲「有心有力」？佢大笑話：「o依家有心多啲！哈哈哈，呢樣嘢冇得認叻嘅！」四哥近期最開心莫過於獲霆鋒送贈八千萬豪宅，不過佢喺人前就做到唔多在乎，四哥喺節目話：「唔通要我跪喺度多謝佢咩？梗係扮瀟酒不過我心裡面果句係『我冇生錯呢個仔』！」
來源 source: http://s.nextmedia.com
|
鍾意就快D Share啦！
|
|
|