43歲陳煒五年前忽然復出去大台拍劇，原來係同台灣富商顏志行離婚，由男方提出，二人因為性格不合喺有共識下和平分開，前日煒哥返去拍《果欄中的江湖大嫂》，對於早前忽然回應離婚一事，佢解釋：「因為佢見到報道涉及第三者，唔係事實，自己想去澄清，唔想影響到其他人，今日講番俾大家聽，5年前我已經同先生離咗婚。」講到報道中被指係「第三者」嘅台灣歌手鄭雙雙，問到係咪認識?陳煒笑住講：「認識，絕對唔係（第三者），絕對冇呢件事，佢哋冇任何關係，都係朋友，因為佢哋只係有共同朋友，咁啱有個朋友喺峇里結婚，分別請佢哋去飲，先會在同一個時空出現，絕對唔屬實，如果有影響鄭雙雙都要同佢講聲對唔住。」講到上年陳煒拍《煒哥的味道》，顏志行都有現身拍攝由台北跟到台南，睇落仲好溫馨，被指係人前扮恩愛，煒哥都有解釋!主持問到喺節目中，老公嚟埋探班又出鏡，陳煒就話：「呢個其實係佢自己都好想嚟玩，佢自己好鍾意食材嘅嘢，有開餐廳，對拍攝又有興趣，佢自己話不如嚟探你班，好想體驗吓係點，我邀請佢，佢又好樂意幫忙出鏡，都有諗過好唔好呢，呢件事就做咗，亦都有播出街，如果大家覺得我有隱瞞嘅，我就講聲唔好意思。」陳煒又話至今同前夫仍然維持友好關係，講及5年前同前夫離婚嘅心路歷程，佢都好多謝朋友同公司支持：「唔鍾意都唔會嫁俾佢，5年前係比較難過渡啲，好彩身邊好多朋友同公司都知道呢件事都係支持我，趁住療傷時，公司都俾咗好多機會我，希望我可以專心去拍戲，分散啲注意力。」咁同前夫關係好，會唔會有機會復合？陳煒坦言：「唔知，所以我一路將自己感情同婚姻保持咁低調，唔想去講，一嚟佢唔係圈中人，佢又唔喺香港，所以想保護番，大家有個心係想為大家好，所以選擇唔公開，之前有報道講感情有變化、可能離咗婚，我都唔回應，希望大家唔好介意，我自己喺感情好想保護番，話我守舊好，點都好。」
|
鍾意就快D Share啦！
|
|
|