唐詩詠爭做老銅餅后擲百萬搶敏之頭啖湯
藝人唐詩詠以老闆娘身份於銅鑼灣主持其蛋糕店開幕禮，女神瞇眼試蛋糕冧客，揚言賣完蛋糕做「餅后」就買樓。而「曲奇天后」靚媽陳敏之昨日亦親自為其品牌月餅拍廣告，她不諱言逐步進軍蛋糕店，說到詩詠搶了頭啖湯，敏之坦言：「有良性競爭係好事。」
娛樂圈很多藝人都有投資生意，更有不少做埋生招牌搶客，而曲奇及蛋糕這些老幼鍾愛的美食更成熱門生意，除了謝霆鋒、古巨基、陳敏之、謝寧於港島區開店外，連唐詩詠、黃婉曼、鄭欣宜都紛紛進軍銅鑼灣餅業巿場，齊齊爭做「餅后」。
昨日唐詩詠就以老闆娘身份出席有份投資、位於銅鑼灣的餅店開幕禮，更即席瞇眼試蛋糕冧客！詩詠接受訪問時坦言今次與友人合資共七位數字：「之前除了每日巡舖、做QC（品質監控）及設計餅盒外，更親身飛到北海道學整蛋糕，親力親為。（黃翠如結婚，會贊助佢結婚蛋糕？）可以整個大蛋糕畀佢！（想做商界女強人？）冇呀，其實都係機緣巧合，自己又鍾意食，咁就試吓，希望可以做得好好！」
冧掂粉絲幫襯
問到是否冇拖拍所以專心搞生意？她坦言：「都會多咗時間嘅，係一個好好嘅Timing去做。」諗頭多多的詩詠坦言，想過Rap段Freestyle為餅店谷人氣。問到是否賣完蛋糕買磚頭，她說：「可以就梗係最好都朝住呢個目標去。」詩詠忙完舖頭開幕後，在女友人陪同下匆匆離開，當她見門外大批粉絲守候即趁機拉客，與他們傾了一輪後又叫他們多多幫襯，粉絲當然大力支持，個個買到一袋二袋，期間一名男粉絲更與詩詠玩自拍。隨後詩詠急急腳步往附近酒店，趕着傾生意的她臨入門口亦與粉絲揮手道別。
而「曲奇天后」敏之現時於港、澳兩地已有六間分店之多，店舖遍及金鐘、尖沙咀、天后、旺角等地，生意不俗，昨日靚媽敏之親身上陣為其品牌月餅拍攝廣告硬照，更不諱言曾打算於銅鑼灣開店：「依家雖然忙住湊仔，不過我都會盡量抽時間打理生意，親力親為，依家各間舖嘅生意都愈來愈好，之前我一直都有留意銅鑼灣啲舖位，睇過好多次，蛋糕生意真係要睇啱先得，各樣嘢要配合，自己天后有舖，所以都唔急，我都有計劃做埋蛋糕、麵包，不過工場方面都係問題，所以要一步一步嚟，等我忙埋月餅先！」
靚媽歡迎良性競爭
談到詩詠搶頭啖湯開蛋糕店，敏之笑說：「冇所謂，我主打係曲奇，味道都唔同，我都好支持佢，今日我化妝師都有買咗詩詠嘅蛋糕嚟，我都有試過，大家交流吓，以前古巨基開曲奇店，我同佢太太都有交流心得，大家各有各做，有良性競爭係好嘅！」
文：影視組
|
鍾意就快D Share啦！
|
|
|