多得一位疑似借個女上位嘅爸爸，先知道喺觀眾面前幾乎都係笑口噬噬嘅薛家燕，原來都會對人不滿，不過今次講嘅唔係人哋爸爸，而係曾經同家燕姐以「不和」扯上關係嘅人——苑瓊丹（苑仔）。
回帶返到2003年，當年拍緊《皆大歡喜》時裝版，有傳因為苑仔唔滿意家燕姐遲到兩分鐘，而喺化妝間破口大罵，當時家燕姐堅持自己冇遲到，並指苑仔冇禮貎，甚至有指家燕姐鬧苑仔「冇家教」，結果兩人爭持不下，有傳出動到該劇監製徐遇安出面調停。當時有傳苑仔其實早對家燕姐不滿，因家燕姐除咗拍劇之外，仲有電台主持、登台、拍廣告等，瓣數多多，經常要度期拍劇，變相影響到其他演員，所以苑仔早有微言，到嗰日先突然嚟個大爆發。
不過，事後家燕姐否認有不和事件，並指有人放流料，又澄清自己冇講「冇家教」，更稱平日開工時與苑仔有講有笑，家燕姐直言嬲到想喊，又曾聯絡過高層曾勵珍，要揪出元兇云云。而喺拍《皆》劇外景時有記者探班，家燕姐同苑仔更攬頭攬頸合照，以行動證明兩人冇不和；同劇演員之一陳彥行更指從冇發生不和事件。
苑仔雖然直認曾與家燕姐曾發生曾執，但強調沒有不和，仲話有人加鹽加醋，更指佢同家燕姐由《真情》開始合作，大家都有份度期，所以好明白。
講就咁講，事件發生幾個月後，有一場安排演員食月餅嘅戲份，又咁啱係家燕姐代言嗰個品牌，有指場內人士，包括苑仔在內拒食，令不和傳聞再被炒熱，家燕姐例牌否認，仲話會約同劇演員食飯，但就唔係擺和頭酒。
而呢個「不和」事件，一度喺09年「復燃」過，話說當年苑仔喺電台節目中大爆娛圈女星豪放史，當中涉及鹹豬手，事件越鬧越大，講嘅人就覺得爆料當笑料，但係牽連甚廣，最後家燕姐被問及事件時，亦認為苑仔應該收口，致令兩人不和消息再被翻炒。
其實《皆大歡喜》本來係套喜劇，不過，鬧不和嘅其實唔止家燕姐同苑仔，喺古裝版中，要「共侍一夫」嘅趙學而同梅小惠亦鬧不和，起因同樣因為遲到而起，有指因趙學而遲到影響拍攝進度，引起梅小惠不滿，趙學而某次再因遲到向現場演員道歉時，因梅小惠態度不友善，令趙學而憤然割席。（新聞連結： http://bit.ly/2weVp4A ）
| （資料圖片） |  家燕姐（右）同苑仔被傳過不和 |  但二人否認 |
 又一齊出席過台慶頒獎禮 |  有傳家燕姐要搵珍姐（前排右二）搵出放不和流料嘅造謠者 |  家燕姐同苑仔多次合作，圖為時裝版《皆大歡喜》。（劇照） |
 趙學而（左）及梅小惠亦因合演《皆大歡喜》而傳不和。（劇照） |
|
鍾意就快D Share啦！
|
|
|