探熱針
唔刪拍拖周年相 港姐雷莊𠒇有米前度痴等
今屆雙料港姐冠軍雷莊𠒇（ Juliette Louie），當選後一直負評多多，有指她獲獎全靠有個富爸爸雷葆文撐腰。據了解，雷莊𠒇獲獎並非有父蔭，而是跟無綫高層關係友好的有米前度 Brandon Lim在背後發功，二人去年三月雖已分手，雷莊𠒇亦公開牙醫新歡，但 Brandon對前度依然照顧周到，不單唔刪親密相，更願意做痴心情長劍等復合。
三年完成大學
雷莊𠒇老豆雷葆文於九九年金融海嘯損手離場，手上物業要蝕讓外，更先後被多間公司入稟追討接近百萬債項。一二年，雷莊𠒇一家移民加拿大，有債在身的雷葆文大部分時間在內地搵食，準備入學的雷莊𠒇要生活費，兼職模特兒，又慳錢以三年時間完成四年大學課程。
「佢哋一家本來生活幾好，爹哋投資咗好多物業有過億身家，不過九九年金融風暴蝕晒，得番一間公司，到而家都喺內地做嘢，佢同人講話叫搵到吓食。所以 Juliette大學開始半工讀靠自己，做兼職內衣 model，用三年時間讀完大學，因為好想快啲做嘢搵錢， Juliette之前話想去荷里活發展，係真心話，因為如果無綫開嘅條件唔理想，佢索性返加拿大搵機會賺多啲錢。」雷莊𠒇身邊人透露。
秘搬舊樓
被指身家豐厚的雷莊𠒇，參選初期一直入住每晚房價約一千元的富薈炮台山酒店，當選冠軍後她依舊返回上址。不過記者連日發現，雷莊𠒇出席活動後，先會「做樣」返酒店，待數分鐘後便會離開，步行到 3分鐘路程、有 44年樓齡的舊樓，據知她月租的七百呎單位約兩萬五，比起租住每晚過千元酒店，確實化算好多。
前度同高層打招呼
既要讀書，又要做工搵銀，但雷莊𠒇大學三年依然抽到時間拍拖，跟年紀大他十四年，做貿易生意的有米 Brandon Lim經常周圍飛去旅行，分手前，二人慶祝拍拖三周年，更 po相開心 share。
「 Brandon識人多，知道前度返香港參加比賽，特登事先同無綫高層打過招呼，所以好多人睇住 Juliette，今次得獎唔關老豆事，係前度撐佢啫。」知情者說。
表面風光
頭頂光環的港姐，歷年來都予人嫁得好、住得好、著得好，樣樣皆具質素的印象，但高貴包裝背後，亦有另一面。有港姐住過劏房、父親欠債等事件。
暗示等復合
就算去年底公開有牙醫新男友 Hanmin， Brandon既沒有將二人拍拖以來的親密相刪走，更向前度暗示等復合。
「 Juliette好大方，同幾個前度仲有聯絡，分手可以做番朋友，佢都冇刪以前拍拖嘅相， Brandon對佢咁好，佢又點會唔知。不過同新男友拍拖唔夠一年，仲係好 sweet，冇諗過復合。」身邊人透露。
麥明詩馮盈盈幫拖
拍長途拖，雷莊𠒇跟 Hanmin經常隔空互相打氣，早前備受抨擊，男友公開大讚她表現好夠自信：「其實無綫都盡力幫佢拆彈，搵咗幾個港姐同佢開 live講好說話，陳凱琳話自己做 live唔叻，試過講錯嘢推咗，但最後都有麥明詩同馮盈盈幫拖。」
留港支持女兒
連日來受負評影響，見慣風浪的雷葆文亦留港支持女兒，週日（九月十日）早上，雷莊𠒇到灣仔教會，他則孖住老婆約朋友在又一城的意大利餐廳食飯，待女兒跟同行友人在商場 shopping後，一家人才搭的士回家。
翌日中午，雷葆文拖住幾個大喼由北角屋企離開，對於金融海嘯蝕身家，他說：「唔講嘞，多謝關心。（生意要由頭嚟過，會唔會唔開心？）唔會。（而家生意係咪唔錯？）他點頭。」之後便跟雷太登上的士直往機場。
馬蹄露姪仔馬米高拍片 教精寸嘴雷莊𠒇
今屆港姐冠軍雷莊𠒇除咗副尊容極具話題性，連她的寸嘴態度，指人沒受過教育、又暗嘲狗仔隊愚蠢等等，都引來不少負皮。馬蹄露的姪仔馬米高睇唔過眼，拍片話如何用英語教精一個香港小姐。
片中不時揸住個兜的馬米高咁講：「如何將一個冇禮貌嘅香港小姐，變成大方得體的香港小姐。」之後教她點將「 I don't care」的心情有禮貌地表達，相當抵死搞笑。臨尾馬米高更叫港姐應向資深樣衰的前輩藝人，即是他的姑姐馬蹄露取經。馬蹄露回應：「話我樣衰就當佢燒炮仗…….」曲線教雷莊𠒇做人要豁達！
撰文、攝影、攝錄：娛樂組
|
鍾意就快D Share啦！
|
|
|